Նախագահ Վլադիմիր Պուտինի հատուկ հրահանգով Ռուսաստանի պաշտպանության նախարարությունը այսօր երկրի կենտրոնական մարզերում տեղակայված շուրջ 65 հազար զինվորականների մարտական պատրաստվածության ստուգատես է նախաձեռնել:
Ռուսաստանի Դաշնության Զինված ուժերի Գլխավոր շտաբի պետ Վալերի Գերասիմովի խոսքով զորավարժությունները կտևեն մինչև հունիսի 28-ը:
«Հունիսի 28» ամսաթիվը պատահական չէ ընտրված:
Բանն այն է, որ հունիսի 27-ին Ուկրաինան, Մոլդովան ու Վրաստանը Եվրամիության հետ ստորագրելու են Ասոցացման համաձայնագիրը:
Ըստ ամենայնի, ռուսական զորավարժությունները «հարմարեցված» են այդ միջոցառմանը:
Իրադարձությունների զարգացման երկու սցենար է հնարավոր:
Եթե Կրեմլում հաղթեն չափավոր ուժերը, ապա այս զորավարժությունը կծառայի որպես հոգեբանական ազդեցության գործիք:
Եթե գերիշխող լինեն կայսերական տրամադրությունները, չի բացառվում Ուկրաինա, անգամ Մերձդնեստր ռուսական ներխուժման վտանգ, ինչ արդեն հանգեցնելու է լայնամասշտաբ պատերազմի՝ փոխելով նաև ուկրաինական իրադարձությունների էությունը:
Սուրեն Սուրենյանց
