Դուռը հոխորտաց.
- Գիտե՞ք, թե ես ով եմ։
- Իմ խոնարհ ծառան,- պատասխանեց բանալին։

* * *
Աղվեսն իր վանդակից նայեց առյուծի վանդակին ու ծաղրեց.
- Ողջո՜ւյն, մեծափառ արքա։ Հիմա ասա տեսնեմ՝ քո և իմ միջև ի՞նչ տարբերություն կա։
Եվ առյուծը պատասխանեց.
- Տարբերությունը մեծ է։ Ես առաջվա պես առյուծի իմ բաժինն եմ ստանում, իսկ դու՝ աղվեսի։

* * *
Նա երկու ձեռք ունի։ Մի ձեռքով իր շեֆի ոտքի տակ հոր է փորում, մյուս ձեռքով՝ այդ հորի վրա գորգեր փռում։

* * *
- Ես թռչում եմ,- կռկռաց գորտը և քարից ցատկեց ճահճի մեջ:
- Իսկ ինչո՞ւ ոչ թե դեպի վերև ես թռչում, այլ ներքև,- հարցրեց ձուկը։
- Որովհետև Նյուտոնի օրենքն այդպես է պահանջում:

ՎԱԶԳԵՆ ՕՎՅԱՆ