Ջերմուկի բնակիչ, բնապահպան ակտիվիստ Շիրակ Բունիաթյանը ֆեյսբուքյան իր էջում գրել է. «Մե՛նք ջերմուկցիներս, ովքեր իրենց խաղաղ ակցիաների արդյունքում փակ են պահում ԱՄՈՒԼՍԱՐԻ մուտքերը, շարունակում ենք պնդել, որ ԱՄՈՒԼՍԱՐԻ հարցը մեզ համար քաղաքական հարց չի։
     Այո՛, մենք գիտակցում ենք, որ ԷԼԱՐԴ-ի փորձաքննության արդյունքների հրապարակման պահից հետո, երբ աչք է փակվել ակնհայտ վտանգների վրա ու կառավարության կողմից շարունակվել ու շարունակվում է պնդումը, որ պիտի ԱՄՈՒԼՍԱՐԸ շահագործվի, դա ոչ այլ ինչ է, քան հենց քաղաքական որոշում։
     Այդ քաղաքական որոշման պատասխանատվությունը կրում է ներկայիս իշխանությունը, քանի որ իրենց պնդմամբ միջազգային բարձր հեղինակություն ունեցող ԷԼԱՐԴ ընկերությունը, բնապահպանական տեսանկյունից ուղղակի արգելեց ԱՄՈՒԼՍԱՐԻ շահագործումը։
     Մենք չենք ներքաշվում այդ քաղաքական խժդժության մեջ և գիտակցում ենք, որ Փաշինյանն էլ Տեր-Պետրոսյանի, Քոչարյանի և Սարգսյանի պես անցնելու է ու գնա, բայց վեհ ԱՄՈՒԼՍԱՐԸ ՄԻՇՏ ԿԱՆԳՈՒՆ է և կանգուն էլ կմնա։
     ԱՄՈՒԼՍԱՐԸ մեզ համար գոյատևման, իրավունքի և ինքնորոշման հարց է։
     Ու եթե կան մարդիկ, ովքեր սրտնեղում են մեր այս պնդումից և ԱՄՈՒԼՍԱՐԻ հարցում այլևս չեն սատարում մեզ, շատ հանգիստ կարող են իրենց քաղաքական սլաքներն ուղղել այլ տեղ»։