Լավ կլիներ, որ Հայաստանից հնչեր համարժեք պատասխան, գոնե իրենց անձնական PR համար։ Այս մասին այսօր՝ հոկտեմբերի 14-ին, իր ֆեյսբուքյան էջում գրառում է արել «Մեկ Հայաստան» կուսակցության հիմնադիր Արթուր Ղազինյանը՝ անդրադառնալով Ադրբեջանի նախագահ Իլհամ Ալիեւի արված հայտարարությանը։
Գրառման մեջ, մասնավորապես, ասվում է.
«Մինչ Հայաստանում բոլորը հրճվում են եվրոպական նոր ավիաընկերության Հայաստան մտնելու առթիվ, Բաքվում հավաքվել են թյուրքալեզու պետությունները։
Ալիեւը իր ելույթում հայտարարել է.
«Между основной частью Азербайджана и нахчыванским регионом расположен Зангезур. Вывод в свое время Зангезура из состава Азербайджана и присоединение его к Армении расчленили великий тюркский мир в географическом отношении»:
Եթե հիշում եք, Հայաստանում մեծ տոնակատարություն կազմակերպվեց Աշխաբադում Ալիեւի կողմից Նժդեհի հասցեին հնչեցրած որակումներին Փաշինյանի պատասխանելու առիթով։
Նաեւ ուզում եմ հիշեցնել, որ Նժդեհը պաշտպանել եւ Հայաստանին է միացրել Զանգեզուրը, հետեւաբար Ալիեւի այս հայտարարությունը պետք է դիտարկել նախորդի, արդեն գործնական, շարունակություն։
Լավ կլիներ, որ Հայաստանից հնչեր համարժեք պատասխան, գոնե իրենց անձնական PR համար։
Հ.Գ. Թիրախում Զանգեզուրն է, պարոնայք, բացեք ձեր աչքերը, դուրս եկեք հեղափոխական թմբիրից, զբաղվեք Հայաստանի անվտանգության խնդրով, իսկ ինքնաթիռները, ոնց էլ լինի, մի օր կգան»։
