Հանրային հեռուստառադիոընկերության խորհրդի նախագահի խորհրդականի պաշտոնից ազատման դիմում գրած Տիգրան Պասկևիչյանն իր ֆեսյբուքյան էջում գրել է․

«Հարգելի գործընկերներ

Nouneh Sarkissian, Մեդիա նախաձեռնությունների կենտրոն, Boris Navasardian, Երեւանի մամուլի ակումբ, Edik Baghdasaryan, Հետաքննող լրագրողներ ՀԿ, Levon Barseghyan, Ժուռնալիստների «Ասպարեզ» ակումբ, Ashot Melikyan, Խոսքի ազատության պաշտպանության կոմիտե, Մեսրոպ Հարությունյան, մեդիա փորձագետ:

Վերջին չորս ամսվա ընթացքում Հայաստանի Հանրային հեռարձակման ոլորտում կատարվել է էական երկու փոփոխություն։ Առաջինը ՀՀՌ խորհրդի նախագահի ընտրությունն է, որը հանրայինի ստեղծումից ի վեր աննախադեպ երեւույթ էր, իսկ երկրորդը՝ դարձյալ նախադեպ չունեցող, նախագծերի առաջարկների ընդունման բաց հարթակի ստեղծումը. կարեւոր քայլ Հանրայինի եւ հանրության շփման տարածքը կրճատելու ուղղությամբ։ Ակնառու այս փոփոխությունների շարքին կդասեի նաեւ արտերկրյա հեռարձակման հայեցակարգի ստեղծումն, ինչին կանդրադառնամ առանձին։

Այժմ ուզում եմ ձեզ ներկայացնել բաց հարթակում ստացված առաջարկների վիճակագրությունը։ Մեկ ամսվա ընթացքում 346 հեղինակ-համահեղինակներից եւ արտադրող ընկերություններից ստացվել է 555 առաջարկ։ Իմ կարծիքով՝ դրանցից մոտ 100-ն ընտրելով՝ կարճ ժամանակում կարելի է ունենալ իրարահաջորդ մի քանի հաղորդացանցեր՝ բոլորովին նոր, ժամանակին եւ իրավիճակին համահունչ բովանդակությամբ։

Հայտարարված վերջնաժամկետից՝ հուլիսի 10-ից, արդեն անցել է շուրջ երկու շաբաթ, բայց Հանրային հեռուստաընկերությունն, իմ ունեցած տեղեկություններով, դեռ չի հստակեցրել ընտրության կարգն ու սկզբունքերը, ինչը տեղիք է տալիս լուրջ մտահոգության, որ ՀՀԸ տնօրինությունը սուբյեկտիվ, կամայական ընտրություն է կատարելու եւ շատ նախագծեր ուղղակի իրականություն չեն դառնալու։

Որպես բաց հարթակի ստեղծման գաղափարի հեղինակ, ակնկալում եմ ձեր միջամտությունը նախագծերի ընտրության գործընթացն ըստ պատշաճի կազմակերպելու եւ դրանք կյանքի կոչելու հարցում։ Խնդրում եմ առաջարկել եւ հորդորել ՀՀՌ խորհրդին ստեղծել նախագծերն ընտրող ԱՆԿԱԽ հանձնաժողով եւ տալ մասնագիտական, անաչառ գնահատական։

Հարգանք եւ շնորհակալություն»։