Մերձավորարևելյան ուղղությամբ Ռուսաստանի ու Թուրքիայի համատեղ գործողությունների կոորդինացման շուրջ կողմերի միջև ձեռքբերված վերջին պայմանավորվածություններից առաջին հերթին մեծ ակնկալիքներ ուներ Ադրբեջանը՝ փորձելով մերձավորարևելյան հիմնախնդիրների և սիրիական ճգնաժամի կարգավորման շուրջ առկա ռուս-թուրքական կոնսենսուսը տեղայնացնել նաև արցախյան հակամարտության հարցում։
Սակայն պաշտոնական Անկարան կարծեք թե, համենայն դեպս այս փուլում, չի պատրաստվում ի շահ Ադրբեջանի փչացնել Ռուսաստանի հետ ձեռքբերված և Թուրքիայի համար էական նշանակություն ունեցող այս պայմանավորվածությունները։ Սա հիմնավորում է նաև այն հանգամանքը, որ ռուս-ադրբեջանական հարաբերություններում վերջերս նկատելի լարվածության հետ կապված թուրքական կողմը շարունակում է պահպանել լռություն. Հիշենք ՀԱՊԿ նախկին գլխավոր քարտուղարի հայտարարությունը, որտեղ հնչեցված Լեռնային Ղարաբաղի Հանրապետություն ձևակերպումը մեծ անհանգստություն պատճառեց Բաքվում, օրերս տեղի ունեցած ՌԴ ԱԳ նախարար Ս. Լավրովի մասնակցությամբ մամլո ասուլիսին ադրբեջանցի լրագրողի հնչեցրած հարցին Լավրովի բավական կոշտ պատասխանը։ Այսպիսով, Թուրքիայից չստանալով ակնկալվող արձագանքը՝ Ալիևին մնում է առժամանակ սրել լարվածությունը Արցախ-Ադրբեջան սահմանի երկայնքով։
Կարեն Վերանյան
