Հավի մսից ոսկրերն առանձնացնում ենք և մանր կտրատում: Եթե բդիկներ չկան, կարելի է վերցնել նաև կրծքամիս կամ այլ հատված: Պարզապես բդիկն ամենահյութալին է:

Ավելացնում ենք բուսայուղը, լավ աղ ու պղպեղ ցանում և ավելացնում համեմունքները: Գդալով լավ խառնում ենք ու թողնում 20-40 րոպե, որ մարինացվի:

Պատրաստում ենք սոուսը: Կաթսայի մեջ լցնում ենք թթվասերը, կեֆիրը, մանրացրած սխտորը, գինու քացախը, աղը և պղպեղը (եթե գինու քացախ չկա, կարելի է վերցնել խնձորի քացախ կամ մի քիչ կիտրոնահյութ):

Լավ խառնում ենք: Սոուսի խտությունը կարելի է կարգավորել թթվասերի ու կեֆիրի հարաբերակցությամբ: Սոուսը պետք է բավական խիտ լինի, բայց թեթևակի ծորա:

Կաղամբը շատ մանր կտրատում ենք, ավելացնում մի քիչ մանրացրած մաղադանոս, աղ ցանում ու ձեռքերով լավ տրորում, որպեսզի կաղամբը փափկի: Ի դեպ, կարելի է օգտագործել պեկինյան կաղամբ, որը տրորելու կարիք չկա: Ցանկության դեպքում կարելի է ավելացնել կտրատած սոխ:

Վարունգն ու լոլիկը երկար, ձողաձև բարակ կտրատում ենք:

Թավայի մեջ մի քիչ բուսայուղ ենք տաքացնում, միսը դնում մեջն ու անընդհատ խառնելով տապակում 4-6 րոպե (կափարիչը չենք ծածկում, իսկ կրակը միջինից ուժգին պետք է լինի):

Շաուրման հավաքում ենք: Լավաշը բացում ենք, առատ սոուս քսում վրան՝ եզրերից խուսափելով: Աջ եզրից մոտ 7-8 սմ դեպի ներս շարում ենք վարունգն ու լոլիկները:

Վրայից մի քիչ կաղամբ ենք լցնում:

Վրան դնում ենք միսը և սոուս լցնում: Ցանկության դեպքում կարելի է ավելացնել երկրորդ սոուսը՝ կետչուպ կամ լոլիկի սոուս:

Ներքևի ու վերևի ծայրը ծալում ենք:

Մի պտույտ փաթաթում ենք՝ միջուկը թեթևակի սեղմելով:

Պիրկ ռուլետի նման փաթաթում ենք:

Շաուրման լավ տաքացրած չոր թավայի մեջ ամեն կողմից 15-20 վայրկյան տապակում ենք:

Կարելի է մատուցել: