«Փարքինգ Սիթի Սերվիս» ՓԲԸ ներկայացուցիչը վերջերս հայտարարել էր, թե պատրաստ են վաճառել ընկերության բաժնետոմսերը, և ով ցանկանում է, կարող է գնել այն: Մամուլում շրջանառվող տեղեկությունների համաձայն' այս ընկերությունը պատկանում է հայտնի միլիոնատեր Ալեքսանդր (Սաշիկ) Սարգսյանին: Արդյո՞ք Հայաստանում կամ դրանից դուրս կգտնվի մեկը, ով ռիսկ կանի Սաշիկի բիզնեսը գնել:

Առաջին հայացքից տպավորություն կա, որ այնտեղ ոչ մի մեծ ներդրում արված չէ' տարաներով «Որդան կարմիր», մի կտոր ժեշտ, մի քանի մեքենա և վերջ:

Ընկերության ներկայացուցչի հայտարարությունից հետո մայրաքաղաքում սկսեցին լայնամասշտաբ գործ անել, այն է' բոլոր «Որդան կարմիր»-ապատ տարածքների էլեկտրասյուների վրա տեսախցիկների տեղադրում: Եթե ուշադիր եք եղել, երբեմն այդ տեսախցիկները դրված են նույնիսկ փողոցի բոլոր էլեկտրասյուների վրա: Նաև կան տեղադրված տեսախցիկներ, որտեղ դեռ, փառք Աստծո, չկան կարմիր գծերը, իսկ սա նշանակում է, որ շուտով այդ տեղերում ևս լինելու են այդ վճարովի ավտոկայանատեղիները:

Իսկ երբ որևէ լրագրող սկսի հետաքրքրվել, թե ինչ ներդրումներ է արվել այս ընկերության կողմից, կպարզվի, որ այդ տեսախցիկները գերժամանակակից են և արժեն յուրաքանչյուրը, օրինակ, 1000 ԱՄՆ դոլար: Ես և մեր համաքաղաքացիներից շատերը, համոզված եմ, որ չէին բողոքի այս երևույթի դեմ, եթե այդ վճարովի ավտոկայանատեղիները պատկանեին Երևանի քաղաքապետարանին, իսկ դրա դիմաց գանձված գումարները գնային մայրաքաղաքի բյուջե:

Փաստորեն, «Փարքինգ Սիթի Սերվիս» ՓԲԸ-ն այս լայնամասշտաբ տեսախցիկատեղադրումով փորձում է ցույց տալ, թե ինքը ահռելի ներդումներ է անում, և ընկերության արժեքը շատ թանկ է:

Գագիկ Սերոբյան