ՀՅԴ-ն, ընդդիմադիր մյուս խմբակցությունների նման, դեմ է Նպատակային սոցիալական վճարների համակարգի ներդրմանը:

Սակայն քննադատելը հեշտ է, դեմ քվեարկելը՝ նույնպես:

Եթե դեմ ես ու պատասխանատու ընդդիմություն, պարտավոր ես նաև այլընտրանք ներկայացնել:
Հայ Յեղափոխական Դաշնակցություն խմբակցությունը ներկայացրել է նոր կենսաթոշակային համակարգի սկզբունքները:
Ես տնտեսագետ չեմ ու չեմ կարող, առանց մասնագետների հետ խորհրդակցելու,կարծիք հայտնել, թե ինչքանով են իրատեսական այդ առաջարկությունները, բայց գովելի եմ համարում, որ Դաշնակցությունն իր մոտեցումները ներկայացնում է մինչև իշխանության առաջարկած փաթեթի քվեարկությունը:

Հիմա իշխանության որևէ ներկայացուցիչ չի կարող բարձրանալ ամբիոն ու կոնկրետ դաշնակցական պատգամավորներին ասել, թե ձեր նպատակը միայն սևացնելն ու քաղաքական դիվիդենտներ ստանալան է:

Այս ամենի համատեքստում ուզում եմ խոսել մի դաշնակցականի մասին, ում ներկայությունը կարող է պատիվ բերել ուզածդ խորհրդարանի:

Խոսքը՝ Արծվիկ Մինասյանի մասին է, ում ջանքերով մշակվում են այս խմբակցության դիրքորոշումները տնտեսական քաղաքականության վերաբերյալ:

Վերջին օրերին Արծվիկը դարձել է իշխանություն-ընդդիմություն գզվռտոցի թեմա: Մեկը մյուսից պաշտպանում է Արծվիկին՝ իրականում նրան թիրախ դարձնելով:

Արծվիկ Մինասյանը չի կարող լինել իշխանության այնպիսի համակարգում, ինչպիսին կա Հայաստանում՝ ապաքաղաքական, կիսակրիմինալ: Նա նաև այսօրվա ընդդիմության մեջ չի տեղավորվում, որովհետև հայհոյելու ու անիծելու համապատասխան ՙռեսուրս՚ չունի:

Արծվիկ Մինասյանը կարող է լինել իմ պատկերացրած ընդդիմության ներկայացուցիչը, ով քննադատում է՝ իրական այլընտրանքի ներկայացման պատասխանատվության գիտակցումով:

Սուրեն Սուրենյանց