Սքրենտոնյան համալսարանի հետազոտողները հաստատել են, որ ամերիկացու սննդակարգում սուրճը հակաօքսիդանտների համար մեկ աղբյուրն է հանդիսանում: Մի շարք հետազոտություններ ցույց են տվել, որ օրական մի քանի բաժակ սուրճը իջեցնում է երկրորդ տիպի շաքարային դիաբետի, Ալցհեյմերի հիվանդության և նույնիսկ շագանակագեղձի քաղցկեղի առաջացման վտանգը:

Այդ իսկ պատճառով օգտակար է իմանալ, թե ի՞նչ սուրճ ընտրել, ինչպե՞ս այն պահպանել և ինչպե՞ս ճիշտ պատրաստել: Ահա մի քանի օգտակար խորհուրդ Fox News-ից՝ իսկապես առողջարար սուրճ պատրաստելու մասին:

1. Բովում

Ինչքան ավելի բաց է սուրճի հատիկների երանգը, այնքան դրանք ավելի օգտակար են: «Սուրճի հակաօքսիդանտային հատկությունները կախված են քլորոգենաթթու կոչվող նյութից»,- Ասում է Վանդերբիլտի համալսարանի սուրճի ուսումնասիրման ինստիտուտի տնօրեն, բժիշկ Պիտեր Մարտինը: «Կանաչ սուրճը բովելիս դրա հակաօքսիդանտային հատկությունները ուժեղանում են, սակայն եթե չափից շատ բովել, ապա այդ նյութերը նորից քայքայվում են: Այնպես որ փորձեք բաց շագանակագույն հատիկներով սուրճ գնել»:

2. Պահպանում

Համաձայն Food Chemistry ամսագրում տպագրված հետազոտության տվյալների՝ բոված սուրճի հատիկները ազատ ռադիկալներ են պարունակում, որոնք օդի ազդեցությանը ենթարկվելով շատանում են։ Ամբողջ խնդիրը նրանում է, որ սուրճի մեջ գտնվող հակաօքսիդանտները ստիպված ծախսվում են այդ ազատ ռադիկալների հետ պայքարի վրա եւ չեն հասնում Ձեզ։

Այդ իսկ պատճառով սուրճի հատիկները խորհուրդ է տրվում պահպանել հերմետիկ տարայում, ցանկալի է՝ ոչ աղացած վիճակում: Այդպես սուրճի միջի ազատ ռադիկալների քանակը մինիմալ կլինի, իսկ հակաօքսիդանտային հատկությունները կպահպանվեն։

3. Եփում

Իտալացի հետազոտողները ուսումնասիրել են սուրճի եփման 5 ձևեր եւ հայտնաբերել, որ Մոկա, Էսպրեսսո կամ Նեոպոլիտանո սրճեփներում պատրաստված սուրճը ավելի շատ հակաօքսիդանտներ է պարունակում:

4. Հավելումներ

Ինչո՞վ եք Դուք խմում սուրճը: «Ավելի լավ է առանց ոչնչի»,- ասում է Մարտինը: «Սուրճը ինքն իրենով չափազանց սննդարար է եւ բոլոր հավելումները այն միայն փչացնում են»:

Ծայրահեղ դեպքում կարելի է մի քիչ աղացած դարչին ավելացնել՝ սուրճին ավելի դուրեկան համ տալու համար: