Նկատի ունենալով, որ.
* Արժույթի միջազգային հիմնադրամի (ԱՄՀ) գործունեության վրա անդամ պետությունների ազդեցության հնարավորությունը պայմանավորված է հիմնադրամի կապիտալում պետությունների ունեցած բաժնեմասով, ինչն ակնհայտորեն ընդգծում է այդ հիմնադրամի անդամ պետությունների անհավասար կարգավիճակը,
* Հիմնադրամի կառավարիչների խորհրդի որոշումների վրա ԱՄՆ-ն, իսկ որոշ չափով նաև ԵՄ-ն ունեն ուղղակի ազդեցություն և վետոյի իրավունք,
* Հիմնադրամը ծավալում է ակնհայտ ամերիկամետ գործունեություն,
* Հիմնադրամի կողմից առաջարկվող հակաճգնաժամային միջոցառումներն ակնհայտորեն անարդյունավետ են,
* Հիմնադրամի կողմից ներկայացվող պահանջները, այդ թվում՝ կապիտալի ազատ տեղաշարժի, համատարած սեփականաշնորհման (ներառյալ բնական մենաշնորհների՝ երկաթուղու և կոմունալ ծառայությունների), սոցիալական նպատակներով (կրթություն, առողջապահություն, բնապահպանություն, բնակարանաշինություն և բնակմակերեսի արժեքի նվազեցում, տրանսպորտ և այլն) պետական ծախսերի նվազեցման կամ վերացման, պարտադիր կուտակային կենսաթոշակային համակարգերի աղճատված և անտրամաբանական ներդրման, աշխատավարձերի նվազեցման, աշխատավորների իրավունքների սահմանափակման, բնակչության սոցիալապես անապահով շերտի վրա հարկային բեռի ծանրացման և այլ պահանջների ակնհայտորեն ձեռնտու չեն այսպես կոչված ՛՛զարգացող երկրների՛՛, այդ թվում՝ Հայաստանի Հանրապետության համար,
* Հիմնադրամի կողմից իրականացվող կամ աջակցվող ծրագրերն ակնհայտորեն ուղղված են արդյունաբերության վերացմանը, ինչի վառ օրինակն են նախկին Հարավսլավիայի, Ռուանդայի, Մեքսիկայի տնտեսական, վիճակը, իսկ առաջին երկուսի դեպքում՝ այդ ամենի հետևանք դարձած քաղաքացիական պատերազմը,
* Հիմնադրամի կողմից իրականացվող կամ աջակցվող ծրագրերի արդյունքում պետությունների տնտեսական ինքնաբավության հնարավորություններն ակնհայտորեն նվազում են,
* Հիմնադրամի առաջարկ-պահանջների կատարումը վերջնարդյունքում կհանգեցնի ոչ թե պետության ազգային տնտեսության ինքնուրույնության, կայունության, ինքնաբավության և զարգացման մակարդակի բարձրացմանը, այլ դրանց բռնակցմանը միջազգային ֆինանսական հոսքերին,
* Որպես այդ ամենի հանրագումար՝ հիմնադրամի գործունեությունը ուղղված է ոչ թե անդամ պետությունների բարօրությանը, այլ կապիտալիզմի, մասնավորապես՝ արևմտյան կապիտալի զարգացմանը և համաշխարհային տիրապետության հաստատմանը,
Ձախ ճակատը ՀՀ հետագա անդամակցությունն ԱՄՀ-ին համարում է խնդրահարույց և ոչ նպատակահարմար և պահանջում է օրենսդրից չեղյալ հայտարարել ԱՄՀ-ին անդամակցության հետ կապված միջազգային պայմանագրերը:
