Սեպտեմբերի 1-ը Հայաստանում նշվում է որպես գիտելիքի, գրի և դպրության օր. Այն սահմանված է ՀՀ տոների և հիշատակի օրերի մասին օրենքի 12-րդ հոդվածով: Կրթությունը և գիտելիքը, որպես արժեք, հնուց ի վեր հայ իրականության մեջ ունեցել են իրենց կայուն տեղն ու նշանակությունը: Գրքի ու գիտելիքի հանդեպ խոր հարգանքն ու կրթություն ստանալու ձգտումը հայկական մենթալիտետին բնորոշ կողմերից են համարվել: Եվ պատահական չէ, որ մեզանում սեպտեմբերի 1-ը' որպես նոր ուսումնական տարվա սկիզբ և Գիտելիքի օր, միշտ էլ տոնական է լինում:

Սակայն ողջ աշխարհում նշվող գիտելիքի օրը' սեպտեմբերի 1-ը, առանձնահատուկ նշանակություն ունի հատկապես առաջին դասարանցիների համար, ովքեր առաջին անգամ են ոտք դնում դպրոցի կամարներից ներս: Գիտելիքը մարդուն կշիռ է տալիս. տալիս է այն ուժն ու համարձակությունը, որը չի կարող տալ և ոչ մի բան: Մեզ այսօր կրթված հասարակություն է անհրաժեշտ եւ այստեղ մեծ է հատկապես դպրոցի դերն ու նշանակությունը: Շնորհավոր բոլոր աշակերտների, ուսանողների, մանկավարժների, դասախոսների սեպտեմբերի 1-ը' Գիտելիքի օրը:

Սևակ Գրիգորյան