Ռազմագետ, «Հայոց հզոր բանակ» ՀԿ հիմնադիր-նախագահ Կարեն Հովհաննիսյանը ֆեյսբուքյան իր էջում գրել է. «Ադրբեջանում կրկին զորավարժություններ են, որի անունը կրկին դրել են ուսումնական վարժանքներ:
     Սեպտեմբերի 16-20-ը Ադրբեջանը պատրաստվում է անցկացնել լայնածավալ օպերատիվ-մարտավարական զորավարժություններ, որին իրենց մասնակցությունը կբերեն տարբեր տեսակի զորքեր՝ սահմանապահ զորքեր, ներքին զորքեր և այլն: Այս զորավարժությունը ղեկավարելու է Ադրբեջանի ռազմական կառույցի ղեկավարը:
     Զորավարժության անձնակազմը ավելի քան 10 000 զինծառայող է, ներգրավված է 100 միավոր զրահապատ զինտեխնիկա, 20 միավոր ռազմական թռչող սարքեր, այդ թվում ինքնաթիռներ և ուղղաթիռներ, 120 միավոր հրետանա-հրթիռային տարբեր տրամաչափի կայաններ, հրթիռային համազարկային կայաններ, ականանետեր և այլն:
     Զորավարժությունների սցենարում ընդգրկված է դժվար ռելիեֆային, անտառային, գիշերային, ինչպես նաև բարձր ռադոիէլեկտրոնային հաճախականության պայմաններում ռազմական գործողություններ իրականացնելը հրետանու, ռազմական օդուժի համադրմամբ: Նպատակ է դրված, որ այս ամենը հնարավորինս նույնականացվի իրական ռազմական գործողությանը: Զորավարժությունները տեղի են ունենալու Ադրբեջանի ողջ տարածքում, բոլոր այն հրաձագարաններում, որոնց պայմանները թույլատրում են սցենարի իրական պահանջներին»: