Երեկ Ուկրաինայի Դոնեցկի և Լուգանսկի մարզերում անցկացված անկախության հանրաքվեները կարևոր են մեզ համար առաջին հերթին այն պատճառով, որ, ի տարբերություն Ռուսաստանի կազմի մեջ անցած Ղրիմի, դրանցով ոչ միայն նոր քաղաքական շեշտադրումներ են հաղորդվում ներուկրաինական քաղաքական օրակարգին, այլև, գլոբալ մակարդակում, անկախացող տարածաշրջանների գործոնի ակտիվացման նոր փուլ են նախանշում: Կոսովոյի, Աբխազիայի և Հարավային Օսիայի մասնակի միջազգային ճանաչման նախադեպերը հնարավոր է, որ գերտերությունների կողմից նորովի կվերաիմաստավորվեն ու կհանգեցնեն առավել թիրախային գործողությունների և լուծումների: Հանրաքվե անցկացրած ուկրաինական մարզերի խնդիրը կարող է ներկայացվել արցախյան հարցի նմանությամբ և մենք լրջորեն պետք է աշխատենք, որ այդ ուղղությամբ օտարների հնարավոր ջանքերը ոչ թե վնասեն մեզ, այլ օգուտ տան:
