8-րդ օրն է՝ թշնամու զորքը շարունակում է ամրանալ Հայաստանի Հանրապետության տարածքում։ Այս մասին ֆեյսբուքում գրել է «Ռազմինֆո» մասնագիտացված կայքի համակարգող, տեղեկատվական անվտանգության փորձագետ Կարեն Վրթանեսյանը.
«Նիկոլն առաջին իսկ օրվանից հասկացրեց թշնամուն, որ հանգիստ կարող են մնալ՝ հայտարարելով, ըստ էության, թե հայկական կողմը սահմանափակվելու է բանակցելով, ընդ որում բանակցությունների ղեկավարն Արցախում ռուս խաղաղապահների հրամանատարն է (!!!)։
Ավելին, թշնամին ամեն օր նոր ուժեր է մոտեցնում։ Ավելին, Արցախում էլ թշնամին օրեցօր լկտիանում է, թեպետ Արցախի իշխանություններն ամեն գնով փորձում են թաքցնել ինֆորմացիան այդ միջադեպերի մասին։
8-րդ օրն է՝ ՀՀ քաղաքական ուժերն, ըստ էության, լուռ են։ Այդ լռությունն ինձ համար անհասկանալի է, մեղմ ասած։ Ինչ-որ հերթապահ հայտարարություններից զատ, որևէ լուրջ շարժ չեմ տեսնում։
Հականիկոլական ուժերն, օրինակ՝ կարող էին ՀԱՄԱՏԵՂ հայտարարություն անել և սկսել մոբիլիզացնել ժողովրդին (վերջին օրերին հազարավոր նոր մարդիկ են «արթնացել» ու հասկացել, որ Նիկոլն իսկապես ապագա չէ Հայաստանի համար) և հանել փողոց։
8-րդ օրն է՝ սպասում եմ հստակ խոսքի և կոնկրետ գործողությունների քաղաքական ուժերից։
Չմոռանանք նաև, որ ՀՀ այն տարածքը, որտեղ նստել է թշնամին, ԱՄՆ-ն անվանեց «վիճելի տարածքներ»։ ՀՀ ԱԳՆ-ն փորձեց լղոզել այդ թեման, բայց 2 օր առաջ ԱՄՆ պետդեպին ուղարկված հարցմանը պատասխանում ամերիկացիները որևէ կերպ հետ չեն կանգնել իրենց այդ ձևակերպումից (մանրամասն՝ առանձին մեկնաբանությամբ)։
Նոյեմբերի 10-ից անցել է 191 օր։ Որևէ մեկը չի պատժվել խայտառակ պարտության և կապիտուլյացիայի համար»։
