«Այս նախաձեռնությունը միտված է՝ սահմանափակելու խոսքի ազատությունը». «Մեդիա պաշտպան»-ի կոչը
20:31 - 8.Սեպտեմբեր.2020
«Մեդիա պաշտպանը» հայտարարություն է տարածել. «Կոչ ենք անում ընդդիմադիր պատգամավորներին մերժել նախագիծը Ազգային ժողովի փոխխոսնակ Ալեն Սիմոնյանն օրենսդրական նախաձեռնություն է ներկայացրել, որի համաձայն՝ սոցիալական ցանցերում և լրատվամիջոցներում հրապարակված վիրավորանքի և զրպարտության համար փոխհատուցման չափը վիրավորանքի դեպքում 1 միլիոն դրամից դարձնել 5 միլիոն դրամ, զրպարտության դեպքում` 2 միլիոնից՝ 10 միլիոն դրամ: «Մեդիա պաշտպան» նախաձեռնությունը դատապարտում է այս նախաձեռնությունը, որն, ըստ էության, միտված է սահմանափակելու խոսքի ազատությունը։ Զրպարտություն և վիրավորանք եզրույթները Հայաստանում օրենքով հստակ սահմանված չեն։ Սուբյեկտիվ ընկալմամբ այս կամ այն գրառումը կարող է ներկայացվել որպես զրպարտություն, և իշխանությունների կողմից գործիք դառնալ քաղաքացիներին ու մամուլին լռեցնելու համար։ Պետք է բացառել օրենքը սեփական շահերին ծառայեցնելու բոլոր միտումները։ «Մեդիա պաշտպան» նախաձեռնությունը դեմ է զրպարտությանը և վիրավորանքին, միևնույն ժամանակ դատապարտում է խոսքի ազատության դեմ քաղաքական նպատակներով առաջ քաշված նախագիծը։ Կոչ ենք անում ԱԺ ընդդիմադիր խմբակցություններին քայլեր ձեռնարկել այս առաջարկի դեմ և հանուն խոսքի ազատության չթույլատրել նման նախաձեռնության ընդունումը»։
|
327 |