Օլիմպիական խաղերի արծաթե մեդալակիր, ՀՀ ԱԺ պատգամավոր Արսեն Ջուլֆալակյանը խոստանում է Հայաստանի ֆիզիկական կուլտուրայի և սպորտի պետական ինստիտուտի հոգաբարձուների խորհրդի նախագահի պաշտոնում որակյալ և համակարգային լուծում տալ ԲՈՒՀ-ի ունեցած խնդիրներին:
Այս մասին «Ֆեյսբուք»-ի իր էջում գրել է Ջուլֆալակյանը` հավելելով. «Ընտրվել եմ միաձայն, ինչն, իհարկե,անչափ հաճելի է,բայց և միևնույն ժամանակ՝ էլ ավելի պարտավորեցնող։ Աշխատանքի ընթացքում պատրաստ եմ համագործակցության ադեկվատ, շահագրգիռ, բնագավառի հանդեպ սրտացավ բոլոր կողմերի հետ։ Գլխավոր նպատակն է՝ ԲՈՒՀ-ի ունեցած խնդիրների որակյալ և համակարգային լուծումը, ինչպես նաև զարգացման շարունակական ընթացքի ապահովումը»:
Նորընտիր պատգամավորը փաստել է նաև, որ 7-րդ գումարման Ազգային ժողովում ընդգրկված է «Գիտության, կրթության, մշակույթի, սպորտի,սփյուռքի և երիտասարդության» հարցերի մշտական հանձնաժողովում: Ջուլֆալակյանը չի պատրաստվում սահմանափակել պատգամավորի գործունեության շրջանակները՝ ենթադրելով հատկապես վերոնշյալ բնագավառների հանդեպ առավել հատուկ ուշադրություն։
Արսեն Ջուլֆալակյանը ՀՀ ԱԺ պատգամավոր է ընտրվել 2018 թվականի դեկտեմբերի 9-ին կայացած արտահերթ խորհրդարանական ընտրություններում՝ «Իմ Քայլը» դաշինքի համամասնական ցուցակով:
