Այսօր բոլորի ուշադրության կենտրոնում Մինսկն էր, որտեղ տեղի էր ունենալու Մաքսային միության անդամ երկրների, Ուկրաինայի նախագահների ու Եվրամիության ներկայացուցիչների հանդիպումը:
Գագաթաժողովն, անկախ հետագա արդյունքներից, կայացավ:


Ավելին, չնայած հոռետեսական կանխատեսումներին՝ դրան հաջորդեց Ռուսաստանի ու Ուկրաինայի նախագահներ Վլադիմիր Պուտինի ու Պետրո Պորոշենկոյի երկու ժամանոց առանձնազրույցը:


Դժվար է ասել՝ ինչ կտան այս գագաթաժողովն ու առանձնազրույցը ուկրաինական ճգնաժամի հաղթահարման գործընթացին, բայց մի շահող արդեն կա: Դա Բելառուսի նախագահ Ալեքսանդր Լուկաշենկոն է, որի միջնորդական առաքելությունն, անկասկած, կբարձրացնի նրա հեղինակությունը թե իր երկրի ներսում եւ թե միջազգային հարաբերություններում:


Ընդհանրապես, հատկանշական է, որ, ի տարբերություն Պուտինի, ով անընդհատ խոսել է Ուկրաինայի եվրոասոցացման տնտեսական վնասների մասին՝ թե Լուկաշենկոն, թե Ղազախստանի նախագահ Նուրսուլթան Նազարբաևն առավելապես կարևորել են ուկրաինական ճգնաժամի հաղթահարումը՝ ջերմ առանձնազրույցներ ունենալով ուկրաինացի իրենց գործընկերոջ հետ: Այս հանգամանքն ապացուցում է, որ նույնիսկ ուկրաինական հարցում Մաքսային միությունը չի կարող ձևավորել միասնական դիրքորոշում:


Ավարտված բանակցությունների մյուս ուշագրավ հանգամանքն այն է, որ Պորոշենկոն առաջարկել է հիմք ընդունել իր կողմից առաջարկված կարգավորման ծրագիրն, որը ենթադրում է Ուկրաինայում իշխանության որոշակի ապակենտրոնացում:


Ինչ են խոսել Ուկրաինայի ու Ռուսաստանի նախագահները փակ դռների հետևում՝ պարզ չէ, սակայն նրանց հանդիպմանը հաջորդել է Մինսկում գտնվող Եվրամիության արտաքին քաղաքականության հանձնակատար Քեթրին Էշթոնի հայտարարությունը. նա Պուտին-Պորոշենկո հանդիպումը կառուցողական է համարել ու առաջարկել է բանակցություններ սկսել՝ հրադադարի եւ ուկրաինական ճգնաժամը հաղթահարելու ուղղությամբ:
Սակայն առայժմ վաղաժամ է խոսել արդյունքների մասին, մանավանդ որ՝ Ռուսաստանի ու Ուկրաինայի նախագահները՝ թեև խոսել են նույն լեզվով, սակայն տարբեր բովանդակությամբ ու շեշտադրումներով....

 

 

 Սուրեն Սուրենյանց