irates.am Թե որ երկրում որքան բարձր է գնահատվում խոզի ճարպը' չարժե անդրառնալ: Պարզապես նշեմ, որ այն օգնում է ձմռանը հաղթահարելու ցուրտը: Խոզի ճարպը դյուրամարս է, չի ծանրաբեռնում լյարդը, ավելի քիչ խոլեստերին է պարունակում, քան կարագը: Ավելին' խոզի ճարպն արյան մեջ նվազեցնում է խոլեստերինի քանակը: Նշենք, որ խոզի ճարպի մեջ բացակայում են ամեն տեսակ պարազիտները, որոնք իրենց լավ են զգում ձկան կամ մսի մեջ: Եվ մի հիշեցում' ցանկացած մթերք օգտակար է, եթե այն չափավոր է օգտագործվում: Խոզի ճարպի 100 գրամը պարունակում է 750-900 կկալ: Օրական 30-40 գրամ ճարպ օգտագործելը նույնիսկ օգտակար է օրգանիզմի համար, իսկ դրանից ավելին կարող է գիրացման պատճառ դառնալ:
Անցնենք պատրաստմանը: Ասեմ, որ ճարպը պատրաստում են մի քանի ձևերով: Կներկայացնեմ իմ նախընտրած տարբերակը: Նախ' ընտրեք բարձրորակ ճարպ: Այն պետք է սպիտակ կամ թույլ վարդագույն լինի, բայց ոչ մի դեպքում' դեղին կամ արյունոտ: Դեղին գույնը վկայում է ճարպի հնացածության մասին, իսկ արյան հետքերը' մանրէների առկայության: Ուրեմն' ճարպի կտորն ընտրելուց հետո, անկախ նրա քաշից, լավ մաքրեք բոլոր կողմերից, եթե տեսնում եք, որ քերելով վերին շերտը լավ չի մաքրվում, ապա լվացեք և չորացրեք: Կտրտեք ձեր նախընտրած չափով: Հավասար քանակությամբ խառնեք աղ, սև և կարմիր կծու պղպեղ: Ճարպի կտորները բոլոր կողմերից լավ թաթախեք այդ խառնուրդի մեջ: Ապակե կամ էմալե լավ փակվող ամանի մեջ մի քանի դափնու տերև և սխտորի կտորներ դրեք, վրան դասավորեք խառնուրդով թաթախված ճարպի կտորները, դրանք դրեք բոլոր կողմերից' ճարպակտորների արանքներում, շուրջը: Սովորաբար ես սխտորը լայնությամբ բարակ շերտերով կտրտում եմ, այսպես և սխտորն եք տնտեսում և ճարպը արագ է ներծծվում սխտորի բույրով: Աշխատեք, որ դափնու տերևն ու սխտորը չափից շատ չլինեն: «Кашу маслом не испортишь» ռուսական ասացվածքը միշտ չէ, որ ճիշտ է: Ամենը վերջացնելուց հետո այն պահեք սառնարանում: 7-10 օր հետո կարող եք օգտագործել: Նկատի ունեցեք, որ աղի շատ քանակությունից պետք չէ վախենալ, ճարպը «կվերցնի» այնքան աղ, որքան իրեն հարկավոր է: Օգտագործելուց առաջ կարող եք մի փոքր հեռացնել աղապղպեղային շերտը, եթե ձեզ այն աղի կամ կծու է թվում և կունենաք միայն համեմված ճարպ: Բարի ախորժակ:

Կարինե ՀԱՐՈՒԹՅՈՒՆՅԱՆ