- Մոտ 50 երկար ու ձիգ տարիների պատմություն ունի մեր ընկերությունն ու մտերմությունը: Եվ այդ տարիների ընթացքում հազվադեպ են եղել օրեր, որ ՀԱՄՈՅԻ հետ հանդիպած չլինեմ:Ընդհակառակը, օրեր, ամիսներ, տարիներ են եղել, որ վաղ առավոտից մինչև ուշ գիշեր ու գիշերներն անգամ միասին ենք եղել, և ես, ամեն ինչից շուտ հոգնող ու ձանձրացող մարդս, չեմ հիշում դեպք, որ փոքր-ինչ հոգնած ու ձանձրացած լինեմ Համոյից: Մեր հանդիպման առաջին իսկ օրերից, թեև դեռ շատ էի երիտասարդ, զգացել եմ ու հասկացել, որ, հանձին Համո Սահյանի, իմ հոգեկան աշխարհը, իմ կյանքի մեջ է մտել մի արտակարգ անձնավորություն:
...Համո Սահյանի տողերը շատ հաճախ այնքան են սեղմ, զուսպ, անզարդ, զերծ ավելորդություններից, որ թվում է քարի վրա փորագրելու համար են ստեղծված:
ՎԱՀԱԳՆ ԴԱՎԹՅԱՆ