Վերաքննիչ դատարանում այսօր սկսվել եւ ընդհատվել է ՀԱԿ ակտիվիստ, քաղբանտարկյալ Տիգրան Առաքելյանի դատավարությունը: Դատավոր Եվա Դարբինյանը մերժել է Առաքելյանի փաստաբան Մուշեղ Շուշանյանի միջնորդությունը՝ Առաքելյանի խափանման միջոցը փոխելու վերաբերյալ, քանի որ նա միեւնույն է ազատ է արձակվելու համաներումով: Դատավորը ասել է, որ նման միջնորդությունը փաստաբանը կարող է ներկայացնել դատական վիճաբանությունների փուլում:
Տիգրան Առաքելյանը դրանից զայրացել է եւ հայտարարել, որ ինքը հրաժարվում է համաներումից, քանի որ իր նկատմամբ ընթանում է քաղաքական հետապնդում: Դատական կատարածուները նրան հեռացրել են դահլիճից, հեռացել է նաեւ դատավորը՝ առանց որեւէ բան ասելու:
Հիշեցնենք, որ Առաքելյանին մեղադրում են ոստիկանին հարվածելու համար: Խոսքը 2011 թվականի օգոստոսին արձանագրված միջադեպի մասին է, երբ բախում էր եղել ՀԱԿ ակտիվիստ երիտասարդների եւ կարմիր բերետավոր ոստիկանների միջեւ:
Երիտասարդներից Տիգրան Առաքելյանը այն ժամանակ կալանավորվեց եւ ազատազրկված է մինչ այժմ: Ընդհանուր իրավասության դատարանը նրան դատապարտել է 6 տարի ազատազրկումով: Տիգրան Առաքելյանի վրա տարածվելու է անկախության 22-ամյակի առիթով Սերժ Սարգսյանի հայտարարած համաներումը:
Ի դեպ, ՀԱԿ ակտիվիստ Արեգ Գեւորգյանը ֆեյսբուքյան իր էջում տեղեկություն հաղորդելով դատարանում տեղի ունեցողի մասին, գրում է. Դահլիճում լարված իրավիճակից հետո Տիգրան Առաքլյանին ուղեկցող ոստիկանները հրահանգեցին վերջինիս մոտ իջնել նաև գործով որպես տուժող անցնող հատուկջոկատայինին: Սա օրենքի կոպտագույն խախտում է և հավանաբար արվել է Տիգրանին հունից հանելու, նրա նկատմամբ հոգեբանական ճնշում գործադրելու նպատակով:
