Երևանի մամուլի ակումբի նախագահ Բորիս Նավասարդյանը ֆեյսբուքյան իր էջում գրել է․ «Համաձայն եմ Էդմոն Մարուքյանի հետ, որ «Կուսակցությունների մասին» օրենքը մեր պայմաններում ոչ մի բան չի փոխելու: Այդ կարծիքին էի նաև 2018֊ին, երբ հարցը արհեստականորեն արդիականացվեց: Չեմ բացառում, որ ավելի խիստ կարգավորումները նույնիսկ բացասական դեր կկատարեն` դժվարացնելով նոր, առողջ քաղաքական ուժերի ի հայտ գալը, իսկ հները, որոնք բոլոր ռեսուրսներն ունեն հարմարվելու ցանկացած պայմանների, շրջանցելու օրենսդրական նորմերը և շարունակելով գործել ինչպես նախկինում: Ցավոք, չունենք այն կայացած ինստիտուտները, որոնք կապահովեն փոփոխված օրենքի արդյունավետ կիրառումը: Եվ ընդհանրապես, դասական իմաստով կուսակցությունները ներկա իրողություններին (գոնե Հայաստանում) միայն մասամբ են համապատասխանում: Կարգավորման ավելի ճկուն դաշտ է անհրաժեշտ քաղաքական ոլորտում բարեփոխումների համար: Պետք էր դա սկսել տեղական ինքնակառավարման մակարդակից, բայց այստեղ կատարյալ ձախողում արձանագրվեց: Հիմա այդ նույն ձախողված տրամաբանությամբ է առաջ շարժվում խորհդարանական մեծամասնությունը»:
