Իրավապաշտպան, «Ընդդեմ կանանց նկատմամբ բռնության կոալիցիայի» համակարգող Զարուհի Հովհաննիսյանը ֆեյսբուքյան իր էջում գրել է. «Համավարակի շուրջ ծագած իրավիճակի առաջին իսկ օրերից շատ եմ մտածել, թե ինչպես պաշտպանել երեխաներին։
Այսօր Երևանում տեղի ունեցած դեպքը, երբ հայրը, ցած նետելով իր անչափահաս երեխաներին, ինքն էլ նետվել է բարձրահարկից, ուղղակի սահմռկեցուցիչ է։
Կոնկրետ այս դեպքի մանրամասներին չեմ տիրապետում, թե ինչպիսին են եղել հարաբերությունները երեխաների ծնողների միջև (մամուլում տեղեկություն կա, որ նրանք ամուսնալուծված են, սակայն ամուսնալուծության պատճառները հայտնի չեն, արդյոք առկա՞ է եղել ընտանիքում բռնություն, տղամարդու կողմից վերահսկողություն, թե՞՝ ոչ։ Ամեն դեպքում, հարևանների վկայմամբ՝ երեխաները հոր հետ շփվել են, զբոսնել ու խաղացել բակում)։
Ուստի, ես զերծ կմնամ տվյալ դեպքով որևէ մեկնաբանությունից, սակայն ընդհանրացնելով կարող եմ ասել, որ ծնողների հոգեբանական վիճակը՝ աշխատանքը կորցնելը, մեկուսացումը, ընտանեկան հարաբերությունների սրացումը և այլն, հաճախ պրոեկտվում են հենց երեխաների վրա՝ նրանց նկատմամբ տարբեր տիպի ճնշումներով և դաժան վերաբերմունքով։ Ցավոք, մենք չունենք համապարփակ հետազոտություն, ինչպես նաև վերլուծություն, թե նման դեպքերը ինչպիսի գործոններով են պայմանավորված։ Արդյոք ծնողների սեփականատիրական զգացո՞ւմն է գերակա, թե՞՝ այլ գործոններ: Օրինակ՝ սոցիալական խնդիրները և ֆինանսական դժվարությունները ևս ոչ պակաս են ազդում, և այլն։
Բայց, որ երեխաները ամենախոցելի խումբն են և առավել մեծ պաշտպանության կարիք ունեն, դա հստակ է։
Մեր՝ մեծերիս ամեն քայլը, ամեն խոսքն ու դրսևորումը ազդում է երեխաների վրա, երբեն էլ դառնում՝ ճակատագրական»:
