«Համայնքային համախմբման և աջակցության կենտրոն» ՀԿ ղեկավար Օլեգ Դուլգարյանը ֆեյսբուքյան իր էջում գրել է. «Այս տարվա մարտի սկզբին Ռուսաստան մեկնած ՀՀ երկու քաղաքացի (մայր և դուստր, դուստրը 9-ը ամիսների հղիության ընթացքում է գտնվում, արդեն պետք է պառկի, սակայն առանց վճարի տեղի հիվանդանոցում չեն ընդունում), մնացել են դրսերում և չեն կարողանում վերադառնալ Հայաստան, չունեն կացության և սնվելու հնարավորություն։ Իրենք ձեռքի ֆինանսական բոլոր միջոցները սպառված են, մի կերպ երեկ հասել են Դոնի Ռոստով՝ հյուպատոսին հանդիպելու համար։ Այսօր առավոտյան դիմել են հյուպատոսարան: Հյուպատոսին հանդիպել իրենց չի հաջողվել։ Ըստ քաղաքացու՝ իրենց ընդամենը գրանցել են ու ոչնչով չեն աջակցել։ Իրենք հիմա մնացել են դրսում, հյուպատոսարանի մոտերքը շրջում են ու չգիտեն ինչ անեն։
     Քաղաքացին դեռևս երեկ էր ինձ դիմել սոցիալական ցանցով, սակայն այսօր ինձ չի հաջողվում կապվել ՀՀ արտաքին գործերի նախարարության հետ, հեռախոսահամարը չի պատասխանում, չնայած ձայնագրությունը րոպեն մեկ ասում է, որ մնամ գծի մեջ, քանզի իմ զանգը շատ կարևոր է իրենց համար։
     ՀՀ Արտաքին գործերի նախարարությո՛ւն, խնդրում եմ արձագանքել, քաղաքացիները, ովքեր Լոռու մարզի բնակիչներ են, ունեն շտապ աջակցության կարիք, իրենց անհրաժեշտ է ապահովել ժամանակավոր կացարանով և սննդով, աջակցել հղիի ծննդաբերության կազմակերպմանը։
     Քաղաքացիների տվյալները պատրաստ եմ փոխանցել պետական մարմիններին»: