Հայաստանի ավիացիոն ուղևորափոխադրումների դաշտ Ryanair-ի մուտքի մասին ընդամենը 2-3 ժամ առաջ իմացա, ու երբ ծանոթացա պաշտոնյաների ու շարքային ֆեյսբուքահայերի ցնծագին մեկնաբանություններին, ուղղակի զարմացա: Սիրելի՛ հայրենակիցներ, ուրախացել եք՝ որ ի՞նչ…
Ryanair-ը հայաստանյան ընկերությո՞ւն է, որ պիտի գրավի ավիացիոն ուղևորափոխադրումների եվրոպական շուկան, թե՞, չլինելով հայաստանյան, վարձվել է հատուկ զբոսաշրջիկ Հայաստան բերելու համար… Եթե ոչ մեկը կամ մյուսը՝ ապա ո՞րն է ձեր անսահման ուրախության պատճառը: Այն, որ իքս քանակի ուղևոր կբերի Հայաստան, այո՞…
Բայց ինքը միաժամանակ 2*x մարդ կտանի այստեղից, որպեսզի վերջիններս գումարներ ծախսեն դրսում: Իսկ ինչո՞ւ 2*x. որովհետև միջին եվրոպացու եկամուտները 2 և ավելի անգամ գերազանցում են միջին հայաստանցու եկամուտներին, և նրանք կարող են գալ և՛ այս մեկով, և՛ ավելի թանկ մեկ ուրիշով:
Իսկ եթե հիմքը դնենք էժան տոմսը, ապա հարևան Վրաստանում վաղուց արդեն գործում են նման (ցածր արժեք տոմսային) ընկերություններ, ու տոմսի ցածր արժեքը անհրաժեշտ, սակայն ոչ բավարար պայման է գոնե Թիֆլիսից Երևան զբոսաշրջիկ բերելու համար:
Եվ եթե ես լինեի ոլորտի պատասխանատուն, ապա տարիուկես կկորցնեի զբոսաշրջային ենթակառուցվածքների կայացման համար՝ միաժամանակ պայմաններ ստեղծելով, որպեսզի մեր ներգնա տուրօպերատորները պայմանագրեր կնքեն վրացական գործընկերների հետ, և երբ այդ ուղին զարգանար, ապա դրանից հետո նոր միայն կբաղվեի Եվրոպայից ուղիղ Երևան թռիչքուղի բացելու խնդրով:
Վախթանգ Սիրադեղյանի ֆեյսբուքյան էջից:
