Նկատե՞լ եք, որ կրակի մոտ նստածներն այն թեժ պահելու համար, անընդհատ կողքից փայտ են նետում, որ անշեջ մնա:
Այդպես էլ հիմա մեր երկրում է...
Անընդհատ՝ որոշակի պարբերականությամբ, հասարակության մի որոշակի շերտի «կերակրում են» նախկինում կատարված դեպքերի քրեական գործեր հարուցելով, հայտնի անձանց, նախկին իշխանությունների տարբեր օղակների ղեկավարների ձերբակալություններով:
Դա փաստորեն արվում է, հասարակության այդ նույն շերտերի՝ մշտապես դժգոհ ու «տեսարաններ, արյուն պահանջող» սեգմենտին, կրակի նման «թեժ» պահելու, ընդհանրապես երկրում տիրող լուրջ, պրոբլեմատիկ և տնտեսական աճող խնդիրներից, սոցիալական հարցերից, իշխող վարչակազմի հեղինակության ակնկալելի անկման ընթացքից շեղելու նպատակով:
Պարբերաբար, դոզաներով, հասարակության՝ հատկապես կռապաշտ և արդարության հաղթանակի մոլորյալ հատվածի, քննարկմանն են նետվում նախկինների թեմայով քրեական գործեր, ինչ-ինչ հանգամանքներ՝ անկախ ելքից, որպեսզի ցույց տան կրկին, որ իրենք «լուրջ» գործերով են զբաղվում, և թե ինչքան վատն են եղել նախկինները, ինչքան շատ գործ կա անելու և թե ինչքան ժամանակ ու նյարդեր է պետք երկիրն այդ վիճակից հանելու համար: Եվ սա անում են իրենց՝ նորերի չարաշահումները, խախտումները կոծկելով ու կոնկրետ գործերով, լուրջ խնդիրներով զբաղվելու փոխարեն...
Ցավալին այն է, որ դեռևս քիչ չեն դրանով ապրողները, դեռևս շատ են հատկապես առաջնորդի մարմնամասերն ուտողներն ու պաշտողները, պարզամիտներն ու մոլորյալները....