ՀՅԴ-ական Գեղամ Մանուկյանը Արամ Մանուկյանի արձանի մոտ հայտարարել էր, որ թույլ չեն տա որևէ մեկի ճաշակով խորհրդանիշ փոխել՝ նկատի ունենալով ԱԺ փոխնախագահ, «Իմ քայլը» խմբակցության անդամ Ալեն Սիմոնյանի ֆեյսբուքյան գրառումը, ըստ որի՝ իր համար օրհներգի նախընտրելի տարբերակ է Արամ Խաչատրյանի հեղինակածը։
Ալեն Սիմոնյանն արձագանքել է Գեղամ Մանուկյանի հայտարարությանը՝ ֆեյսբուքյան իր էջում գրելով.
«Թեթև տարակուսում եմ, թե ինչ պետք է ինձ թույլ չտա դաշնակցական Գեղամ Մանուկյանը և ինչպես պետք է թույլ չտա: Նախ՝ ես ոչ մի կոնկրետ առաջարկ դեռ չեմ արել, միայն այն, որ օրհներգի հարցով լայն քննարկում է պետք: Դու այս քո ելույթով ակամայից ինձ օգնեցիր՝ արագացնելով այդ քննարկումը, ինչի համար շնորհակալ եմ:
Երկրորդը, ընկեր, դուրս արի անցյալի տրամաբանությունով գործելուց, դու կարող ես ինձ հետ քննարկել, վիճել, ընդդիմանալ, ես կարող եմ քեզ հետ համաձայնել նույնիսկ, բայց ոչ դու, ոչ այն կառույցը, որին դու ակնարկում ես, չեն կարող ինձ թույլ տալ կամ չտալ, ինձ թույլ է տալիս կամ արգելում է ՄԻԱՅՆ ԺՈՂՈՎՈՒՐԴԸ, և որոշումը նույնպես կայացնելու է ժողովուրդը, ում ես գլուխս կախ կենթարկվեմ, եթե իմ առաջարկը չընդունվի: Դեռ այսքանը:
Հ.Գ. Ու ամոթ է համացանցում սեռական բնույթի հայհոյանքներ մի արա, չի սազում…»:
