Պատերազմական իրավիճակում գտնվող երկրի ղեկավարը այս պահին անհարմար իրավիճակում է հայտնվել, քանի որ հակառակորդ երկրի ղեկավար կազմը տարբեր հայտարարություններով, գոնե միջազգային կազմակերպությունների մոտ, սահմանափակում են նրա գործողությունները։

Նախ Հայաստանի վարչապետ Նիկոլ Փաշինյանը ոչ պաշտոնական զրույցի բռնվում Ալիևի հետ, հետագայում հայտարարում է, որ պայմանավորվել են առաջնագծում իրավիճակի լարումը կասեցնել, որը հետագայում նաև հաստատվում է ադրբեջանական կողմից։ Հետագայում Հայաստանի վարչապետը Իլհամ Ալիևին անվանում է՝ կիրթ քաղաքական գործիչ, քանի որ այդպիսի տպավորություն էր ստացել նրա հետ հանդիպումից հետո։ Ալիևին նման բնութագրումը իհարկե մեր սրտով չէ, երևի հենց ինքը՝ Իլհամ Ալիևը, զարմացել է, որ աշխարհում կա մարդ, ում վրա ինքը կիրթ քաղաքական գործչի տպավորություն է թողել, սակայն նույնիսկ այդ պարագայում սա որոշակի զսպող քայլ է ու նախատեսված էր ոչ մեր, ոչ ադրբեջանցիների , առավել ևս Ալիևի համար, այլ միջազգային մի շարք կազմակերպությունների ականջների համար։

Այդ ընթացքում Հայաստանի նախագահ Արմեն Սարգսյանը վրացական հեռուստատեսությանը ստված հարցազրույցի ժամանակ հայտարարում է, որ Արցախի խնդիրը պետք է լուծվի Հայաստանի և Ադրբեջանի օգնությամբ, լուծման շատ եղանակներ կան, բայց մենք նախընտրում ենք բանակցությունները։ Այսինքն , մենք գիտենք նաև այլ տարբերակներ ու պատրաստ ենք դրանց, բայց առաջ ենք տանում խաղաղությամբ բանակցելը։ Այս ամենից հետո ընտրությունը մնում է ձեզ։

Հիմա, իր մասին լավ կարծիք լսած Ալիևը երկու քարի արանքում պետք է որոշի, թե ինչպես է շարունակում իր քաղաքականությունը՝ կրկին կրակոցներով ու զոհերով, թե՞ ընտրում է նախագահ Արմեն Սարգսյանի առաջ քաշած տարբերակը։

Ալիևին կիրթ քաղաքականության դաշտ բերելը շատ դժվար և պատասխանատու աշխատանք է, որի ձախողումը շատ վտանգավոր է։

Աշոտ Ասատրյան