Ուսումնասիրելով Շիրակի պետական համալսարանի վերջին երեք տարիների հաստիքացուցակը և դրան համապատասխան աշխատավարձերը' ևս մեկ անգամ համոզվում եմ, որ նախկին տխրահռչակ ռեկտոր,ՀՀԿ Շիրակի մարզային կառույցի կոռումպացված ղեկավար Սահակ Մինասյանը, ոչ միայն չի հասկացել բուհի առաքելությունը, այլ մինչև վերջ փորձեց անդունդը գլորել 85-ամյա բուհը:

Ավելի տեսանելի ցույց տալու համար պատկերը ներկայացված է աղյուսակով (տե´ս հավելված 1).
Ուսանողական համակազմի թիվը կտրուկ նվազելու է 2018-2019 ուստարում՝ կախված ավագ դպրոցի շրջանավարտների թվից: 2017-2018 ուստարում ունենք 665 շրջանավարտ, իսկ լավագույն դեպքում այս տարի կարող ենք ընդունել 370-ին մոտ առաջին կուրսեցիներ: Այսինքն' 2018-2019 ուստարում լավագույն պլանավորման դեպքում ընդամենը կունենանք 2286 ուսանող:

2018 թվականին հաստատված հաստիքացուցակից ակնհայտ երևում է, որ վարչական աշխատակազմի թիվն ավելի է ուռճացվել և երեք տարվա կտրվածքով ավելացել 60%-ով, իսկ ուսանողական համակազմի թիվը պակասելու է ավելի քան 28%-ով:
2018 թվականի դասաբաշխման ժամանակ արդեն բոլորիս համար պարզ կլինի, որ բուհն ունի հավասար քանակով պրոֆեսորադասախոսական և վարչական աշխատակազմ, բնականաբար սա բուհական համակարգում կործանարար երևույթ է:
2018 թվականի ապրիլի 19-ին հաստատված հասիքացուցակով ռեկտորը ունի 1 դրույք օգնական՝ վճարելով 250 000 դրամ, մեկ դրույք խորհրդական՝ վճարելով 300 000 դրամ, մեկ դրույք գործավար՝ վճարելով 200 000 դրամ, 1 դրույք աշխատակազմի ղեկավար՝ վճարելով 400 000 դրամ, 1 դրույք մամլո խոսնակ՝ վճարելով 180 000 դրամ, մեկ վարորդ՝ վճարելով 150 000 դրամ, իսկ իր աշխատավարձը կազմում է 700 000 դրամ: Այսպիսով, ռեկտորի աշխատավարձը և անմիջական սպասարկումը համալսարանի համար ամսական կազմում է 2 000 000 ՀՀ դրամ, այսինքն' տարեկան 24 000 000 (քսանչորս միլիոն) ՀՀ դրամ (մոտավորապես 110 ոսանողի վարձավճար), իհարկե չհաշվված ծառայողական մեքենայի մինչև 3 000 000 (երեք միլիոն) ՀՀ դրամի ծախսերը և այլ ծախսեր:
Նոր հաստիքացուցակի համաձայն ունենք «Հյուրատան և հասարակական սննդի կազմակերպման» բաժին՝ տրամադրելով 17 դրույք, որոնց ամսական ընդհանուր աշխատավարձը կազմում է 1 661 966 (մեկ միլիոն վեց հարյուր վաթսունմեկ հազար ինը հարյուր վաթսունվեց) ՀՀ դրամ, այսինքն' տարեկան կտրվածքով 20 000 000 (քսան միլիոն) ՀՀ դրամ (մոտ 90 ուսանողի վարձավճար): Նշենք, որ նախկին ռեկտորը միշտ բարձրաձայնում էր, որ համալսարանի բուֆետը աշխատում է ինքնածախսածածկմամբ, սակայն այդպես էլ անհասկանալի է, թե ինչու ենք բուհի բյուջեից տալիս աշխատավարձ, գնում սնունդ, այսինքն' 2017 թ-ի ֆինանսական հաշվետվության ելքերի մեջ հստակ տեսնում ենք գումարի չափը, սակայն մուտքերի մեջ չկա որևէ լումա: Սա զավեշտ է:

Տնտեսական գործունեության, գնումների համակարգման բաժինն ունի 7 հաստիք և ամսական ընդհանուր աշխատավարձը կազմում է 1 140 000 (մեկ միլիոն հարյուր քառասուն հազար) ՀՀ դրամ, այսինքն' տարեկան կտրվածքով մոտ 13 680 000 (տասներեք միլիոն վեց հարյոր ութսուն հազար) ՀՀ դրամ (մոտ 62 ուսանողի վարձավճար):

Ֆինանսատնտեսական վերլուծությունների, ծրագրավորման և հաշվապահական հաշվառման բաժնին տրված է 6 դրույք, որոնց ամսական ընդհանուր աշխատավարձը կազմում է 1 280 000 (1 միլիոն երկու հարյուր ութսուն հազար) ՀՀ դրամ, այսինքն' տարեկան 15 360 000 (տասնհինգ միլիոն երեք հարյուր վաթսուն հազար) ՀՀ դրամ (մոտ 70 ուսանողի վարձավճար): Եվ այսպես շարունակ:

Ցավալին այն էր, որ նախկին ռեկտորի առաջին քայլը բուհի ամենակենսական ստորաբաժանումների փլուզումն էր. 21 ամբիոնները միավորեց 13 ամբիոնների, իսկ 6 ֆակուլտետը՝ 4 ֆակուլտետի՝ մեկնաբանելով բյուջեի արդյունավետ ծախսման անհրաժեշտությամբ: Ստեղծվեցին այնպիսի ամբիոններ, որն անգամ վատագույն երազում հնարավոր չէր տեսնել: Օրինակ՝ «Մաթեմատիկայի, ֆիզիկայի և տեղեկատվական տեխնոլոգիաների» ամբիոն՝ մեխանիկորեն միավորելով երեք ամբիոններ, «Աշխարհագրության, կենսաբանության և քիմիայի» ամբիոն՝ միավորել երեք ամբիոններ, «Հոգեբանության, սոցիոլոգիայի և սոցիալական աշխատանքի» ամբիոն՝ միավորելով երկու ամբիոն և այլն:Նույն պահին փակվեց Գիտության և հետազոտության բաժինը՝ մեկնաբանելով, որ համալսարանը չունի առանձին բաժին ունենալու կարիք, իսկ այս տարի էլ հասկացավ, որ ավելորդ է Գիտության և արտաքին կապերի գծով պրոռեկտորի հաստիքը, իսկ մեր բուհի համար կենսական նշանակություն ունեցող կարևոր հաստիք է համարվում աշխատակազմի ղեկավար-պրոռեկտորը:

Ոչ թե բառերով, այլ փաստերով է ակնհայտ այդ տխրահռչակ անձի վարած հակագիտական քաղաքականությունը և բուհի խեղաթյուրված նոր առաքելությունը:
Հ.Գ. Նախկին ռեկտորի հակագիտական քայլերի վառ օրինակ է աշխատավարձի անհասկանալի և ոչ հավասարաչափ բարձրացումը, որը մեկնաբանվում էր որպես աշխատավարձի 40%-ի բարձրացում:(տե´ս հավելված 2).

Իրականում,Սահակ Մինասյանը ահռելի աշխատավարձեր տալով իր ֆան-ակումբի ներկայացուցիչներին տարրական թալանի ենթարկեց բուհը և հիմա էլ այդ նույն մարդկանց համոզում է,որ նա շուտով՝2 ամսից, հետ է վերադառնալու,իսկ եթե չստացվի էլ,ապա իր ուզած "ընդդիմադիր" մարդուն են կարգելու ռեկտորի պաշտոնում,որ նույնկերպ լափեն համալսարանի բյուջեն և թույլ չտան,որ բացահայտվեն իր և հարազատ ֆան-ակումբի որոշ ներկայացուցիչների գործած ապօրինություները և հանցագործությունները...