Այնպես է ստացվել, որ Հայաստանի ղեկավարությունն այսօր նախագահի ու վարչապետի կազմով գտնվում է արտերկրում։ Նախագահ Սերժ Սարգսյանը Փարիզում՝ Ելիսեյան պալատում, հանդիպել է Ֆրանսիայի նախագահ Էմմանուել Մակրոնի հետ։

Համատեղ հանդիպման ընթացքում արծարծվել են մի շարք կարևոր թեմաներ, մասնավորապես՝ Մակրոնը բավականին հանգամանալից անդրադարձ է կատարել ԼՂՀ հիմնախնդրի կարգավորման կարևորությանը՝ մատնանշելով, որ կողմերը պետք է հարցի կարգավորման համար գտնեն անհրաժեշտ ու համարձակ փոխզիջումներ, քանզի այլ կերպ հարցը կարգավորել դժվար կլինի։ Կարելի է իհարկե ասել, որ Մակրոնը գուցե ոչինչ չի ասել, սակայն շատ կարևոր է ասված խոսքի պահը։

Դա ասվել է այն բանից հետո, երբ ընդամենը մի քանի օր առաջ հանդիպել են Հայաստանի ու Ադրբեջանի արտաքին գործերի նախարարները՝ քննարկելու կոնֆլիկտի լուծման հետագա քայլերը։ Վիեննայի ու Սանկտ Պետերբուրգի հայտնի հանդիպումներից հետո ձեռք բերված պայմանավորվածությունները այդպես էլ ի կատար չեն ածվում։ Այս ֆոնին Մակրոնը հայտարարությունը յուրատեսակ մեսիջ է Ադրբեջանին, որի շուրջ օղակը գնալով պրկվում է։ Նրանք հրաժարվում են մեխանիզմների տեղադրումից, հրաժարվում են ԵԱՀԿ նախագահի անձնական ներկայացուցչի գրասենյակի ու ֆունկցիաների ընդլայնումից, այնպես որ, այս ճնշումը գնալով մեծանալու է։

Մակրոնը խոսում է ստատուս քվոյի անթույլատրելի լինելուց, և դատելով նրանից, որ ռազմական ճանապարհով հարցը լուծելու տարբերակը գոնե բոլոր կողմերն իրենց ներկայացուցչական խոսքում բացառում են, կարող ենք եզրակացնել, որ Ֆրանսիան կողմնակից է հարցի խաղաղ կարգավորմանն ու ավելի շատ հայկական կողմի հանդեպ անթաքույց համակրանք ունի։