Սա այն դեպքն է, որ ուղղակի պետք է արժանին մատուցել ներկա քաղաքական բավականին խառնաշփոթ և երկդիմի պայմաններում պետական գործչի կողմից արահայտած՝ առանց որևիցե կեղծավորության, սրտից բխող և շատ ճշգրիտ արտահայտության համար: 
Թուրքիայի և ՌԴ առաջնորդների այսօրվա ելույթները ուղիղ եթերով հեռարձակվում էին ռուսական RT հեռուստաալիքով, և լայն հանրությունն ականատես եղան, թե ինչպես Թուրքիայի նախագահ Էրդողանը Ռուսաստանի նախագահ Պուտինի հետ հանդիպման ժամանակ իր գործընկերոջը ռուսերենով անկեղծ շնորհակալություն հայտնեց: Երբ Պուտինն ավարտեց բարեկամ երկրին՝ Թուրքիային ուղղված իր ելույթը, Էրդողանն, աջ ձեռքը դնելով սրտին, արտասանեց ռուսերեն «спасибо»՝ «շնորհակալություն» բառը, և երկու երկրների ղեկավարները տեսախցիկների առջև ջերմորեն իրար ձեռք սեղմեցին:


Իրոք, «спасибо», որ թուրքական պետության ներկա շատ վիճահարույց սահմանները կան և կլինեն շնորհիվ բոլշևիկյան Ռուսաստանի, որ կա Ադրբեջանը՝ փաստացի թուրքական երկրորդ պետությունը: «Спасибо», որ շատ ժամանակին, առանց հապաղելու, 1920-ին օկուպացվեց անկախ Հայաստանը և դրանով փրկվեց Թուրքիան, որ Հայաստանի տարածքները 1921-ին կիսվեցին Թուրքիայի, Ռուսաստանի և Ադրբեջանի միջև: «Спасибо», որ բոլշևիկյան Ռուսաստանը օգնեց նաև, որ Թուրքիան պարտության մատնի իր մեկ այլ թշնամուն՝ Հունաստանին: Եվ ահա այդ ամենի համար՝ իրոք, որ, թուրքական ջերմ «спасибо», Ռուսաստան: