Պարոն Սարգսյան, ամեն զորակոչի ժամանակ, բացի 18 տարեկանը լրացած անձանցից, պարտադիր բժշկական զննության են ենթարկվում նաև նախորդ տարիներին Հանրապետական զորակոչային և զորակոչային կենտրոնական բժշկական հանձնաժողովների կողմից պարտադիր զինվորական ծառայությանը ոչ պիտանի ճանաչված ՀՀ քաղաքացիները։
Զինապարտության մասին ՀՀ օրենքի 14-րդ հոդվածի 2 մասով՝ առողջական վիճակի պատճառով պարտադիր զինվորական ծառայության համար ժամանակավորապես ոչ պիտանի զորակոչիկներին զորակոչից տարկետում տրվում է 1 անգամ՝ 3 տարի ժամանակով: Տարկետման ժամկետը լրանալուց հետո զորակոչիկը բժշկական քննության արդյունքներով կամ ճանաչվում է պիտանի զինվորական ծառայության համար և զորակոչվում է զինվորական ծառայության, կամ ճանաչվում է խաղաղ պայմաններում զինվորական ծառայության համար ոչ պիտանի և հաշվառվում պահեստազորում, կամ ճանաչվում է զինվորական ծառայության համար ոչ պիտանի և հանվում զինվորական հաշվառումից:
Բացի այդ՝ սույն հոդվածի 4-րդ կետի հիման վրա պահեստազորում հաշվառված քաղաքացիները ենթակա են բժշկական վերափորձաքննության' 5 տարին մեկ անգամ:
Ես՝ 2011թ․ ապրիլի 21-ին, ԿԲՀ առընթեր հանձնաժողովի կողմից ճանաչվել եմ ոչ պիտանի ծառայությանը խաղաղ պայմաններում՝ ըստ հիվանդությունների ցուցակի առաջին սյունակի 86 Բ հոդվածի(բարձր աստիճանի կարճատեսություն, ինձ մոտ -8,5 - 8,0 է) համաձայն և հաշվառվել պահեստազորում(ենթարկվել եմ վերազննման նաև 2016թ․ և ենթարկվելու եմ վերազննման նաև 2021թ․)։
Պարոն Սարգսյան, ամեն տարի պետպատվերով բժշկական վերազննման համար բավական մեծ միջոցներ են ծախսվում, սակայն, ակնհայտ է, որ ոչ միայն իմ խնդրով, այլև խաղաղ պայմաններում ոչ պիտանի ճանաչված այլ ՀՀ քաղաքացիները ոչ երեք, ոչ էլ հինգ տարի հետո վերափորձաքննությունների ենթարկվելով, չեն կարող ճանաչվել պիտանի։ 21 տարեկանից հետո կատարված վերափորձաքննություններն ամեն անգամ հաստատում են, որ դու այո ունես այդ խնդիրը և չես կարող զորակոչվել, այսինքն՝ այդ ամենը կրում է զուտ ձևական բնույթ։
Ստացվում է այնպես, որ, ըստ օրենքի, ես 27 տարեկանը լրանալուց հետո էլ պետք է հինգ տարին մեկ ենթարկվեմ վերափորձաքննությունների, որոնց արդյունքներն արդեն այսօր հայտնի են և դա վերաբերում է ոչ միայն ինձ․․․
Առաջարկում եմ Ձեզ Հանրապետական զորակոչային և զորակոչային կենտրոնական բժշկական հանձնաժողովների հետ քննարկումներից հետո, օրենքի նախագծում ներառել փոփոխություններ, ըստ որի այն քաղաքացիները, որոնք 21 տարեկանից հետո ճանաչվում են ոչ պիտանի զինծառայության համար խաղաղ պայմաններում(այն է՝ այդ հիվանդությունները հնարավոր չի բուժել և քաղաքացուն դարձնել պիտանի շարային ծառայության համար) այլևս չենթարկվեն վերափորձաքննության․ զինկոմիսարիատներն ամեն տարի ահռելի քանակությամբ ուղեգրեր են տալիս վերը նշված խմբի մարդկանց համար՝ շատ լավ գիտակցելով, որ այդ մարդիկ մեկ է պիտանի չեն ճանաչվելու ծառայության համար։
Պարոն Սարգսյան, հուսով եմ՝ իմ առաջարկը պիտանի կլինի ձեզ համար՝ Զինապարտության մասին ՀՀ օրենքն ավելի հստակեցնելու համար։
Հարգանքներով՝ Հենրիխ Մարգարյան