Կալիֆորնիայի Սաութ Փասադենա քաղաքի բնակիչ Արամազդ Անդրեասյան Ավագը դատապարտվել է 25 տարուց մինչև ցմահ ազատազրկման՝ որդու սպանության համար:
Անդրեասյանը վաղաժամ կարող է ազատ արձակվել միայն 25 տարի անց։ Այս վճիռ կայացրել է Ալհամբրայի Գերագույն դատարանի դատավոր Քեթրին Բրոգեմը։

Երեխայի մայրը դատարանում արտասվել և անիծել է Անդրեասյանին։ «Ես անիծում եմ քեզ։ Դու ձախողվել ես որպես հայր, ձախողվել ես որպես մարդ, ձախողվել ես որպես տղամարդ»,- ասել է Անա Էստեվեսը։

Անդրեասյանն օգոստոսի 1-ին իրեն մեղավոր էր ճանաչել իր որդու՝ 5-ամյա Արամազդ Անդրեասյան Կրտսերի սպանության մեջ։ 

Հիշեցնենք, որ երեխայի մարմինը հայտնաբերվել է Կուչումա լճում, Սանտա Բարբարայում։ Մեղադրող կողմը պնդում է, որ Արամազդ Անդրեասյանը որդուն սպանել է կնոջից՝ Աննա էստեվեսից վրեժխնդիր լինելու համար։ Նրան սկզբում ձերբակալել, ապա ազատ էին արձակել։ Ի վերջո, Անդրեասյանին բռնել էին Լաս Վեգասում, ըստ քննիչների նա մտադիր է եղել փախչել երկրից։