Նախօրեին Իրանի Մեջլիսում տեղի ունեցած լիագումար նիստում 288 պատգամավորից՝ 236-ը կողմ քվեարկեց ԱԳ նախարարի թեկնածու Մոհամմադ Ջավադ Զարիֆին, ինչը պետք է նշել արդեն մեկ անգամ պաշտոնավարած և ներքին ու արտաքին բազմաթիվ մարտահրավերներ հաղթահարած նախարարի համար լավ ցուցանիշ է:

Նախկինում Իրանի ԱԳ նախարարի երեք տեղակալներից յուրաքանչյուրը մի տարածաշրջան էր համակարգում: Նոր որոշման համաձայն՝ այդ փոխնախարարների հաստիքները լուծարվում են, և դրանց փոխարեն բացվում է ԱԳ նախարարի՝ քաղաքական հարցերով տեղակալի հաստիքը:
Բացի այդ՝ այսուհետ Իրանի ԱԳ նախարարը կունենա նաև տնտեսական հարցերով տեղակալ: Ինչպես Իրանի ԱԳ նախարարի ծրագրում է նշված, այնպես էլ խորհրդարանում քննարկումների ժամանակ արտգործնախարար Զարիֆը հայտարարել էր, որտնտեսական հարցերն Իրանի արտաքին քաղաքական առաջնահերթություններից են:

Օրերս Մեջլիսում տեղի ունեցած քննարկումների ընթացքում պատգամավորների հիմնական նկատառումներից մեկը վերաբերում էր Իրանի՝ նախկին ԽՍՀՄ անդամ հանրապետությունների, մասնավորապես հարևանների հետ հարաբերությունների խորացմանը: Իրանի ԱԳՆ համակարգում տեղի ունեցած կառուցվածքային փոփոխությամբ պայմանավորված պետք է ակնկալել, որ առաջիկայում Իրան-Հայաստան հարաբերություններում տնտեսական բաղադրիչն ավելի մեծ ուշադրության կարժանանա:

Արմեն Իսրայելյան