Ադրբեջանի նախագահ Իլհամ Ալիևը հավանության է արժանացրել Թուրքիայի զինված ուժերի տրամադրության տակ Գըզըլ Շյարգ ռազմական ավանում և Զեյնալաբդին Թաղիև ռազմական օդանավակայանում տարածքներ տրամադրելու մասին արձանագրությունները: Դրանք Ադրբեջանի ու Թուրքիայի կառավարությունների միջև ստորագրվել էին 2016թ.-ի հունիսին:


Այդ արձանագրություններով, սակայն, Ադրբեջանի տարածքում չեն կառուցվելու թուրքական ռազմակայաններ, քանի որ 2010թ.-ին ընդունված Ադրբեջանի Ռազմական դոկտրինը բացառում է Ադրբեջանի տարածքում օտարերկրյա ռազմաբազաների ստեղծումը(դա արգելում է նաև Ադրբեջանի սահմանադրությունը):
Ռազմական դոկտրինի մեջ նշված է, որ օտարերկրյա ռազմակայանները չեն կարող տեղակայվել Ադրբեջանի տարածքում բացառությամբ այն դեպքերի, երբ Ադրբեջանը կնքել է միջազգային համաձայնագրեր կամ ռազմա-քաղաքական կտրուկ փոփոխությունների ֆոնին Ադրբեջանն իրեն իրավունք է վերապահում ժամանակավորապես իր տարածքում տեղակայել օտարերկրյա ռազմակայաններ:


Զեյնալաբդին Թաղիև ռազմական օդանավակայանից Ադրբեջանն իրականացնում էր իր խաղաղապահների գործուղումը Կոսովո, Աֆղանստան և Իրաք, իսկ այդ տեղափոխությունն իրականացվում էր թուրքական ռազմա-օդային ուժերի ինքնաթիռներով:


Գըզլը Շյարգ ռազմակայանի տարածքում գտնվող կառույցները վարձակալությամբ տրվում են Բաքվում թուրքական ռազմական կցորդին: Թուրքական մասնագետները վաղուց օգտագործում էին այդ երկու ռազմակայանների ենթակառուցվածքներն այդ թվում համատեղ զորավարժությունների ընթացքում՝այժմ այդ կառույցներն ունենալու են նաև դիվանագիտական կարգավիճակ:


Զեյնալաբդին Թաղիևը՝նախկին Նասոսնայա խորհրդային ռազմակայանն է, որը գտնվում է Սումգայիթի մերձակայքում, մինչև 1992թ.-ը խորհրդային ռազմա-օդային կայան, իսկ այժմ գտնվում է ադրբեջանական ռազմա-օդային ուժերի տրամադրության տակ:


Ինչ վերաբերվում է Գըզըլ Շյարգ ռազմակայանի տարածքին, ապա այն գտնվում է Բաքվի բնակելի թաղամասերից մեկի տարածքում:


Այս համաձայնագրով Թուրքիան հնարավորություն է ստանում ունենալ իր ռազմական ներկայությունը Ադրբեջանում՝մարզել, պատրաստել ադրբեջանցի օդաչուների և այլ մասնագետների, իրականացնել համատեղ զորավարժություններ՝ֆորմալ առումով չունենալով այդ երկրի տարածքում իր ռազմակայանները: Այդ համաձայնագիրը թուրք-ադրբեջանական ռազմա-տեխնիկական համագործակցությունը կբարձրացնի նոր մակարդակի վրա:


Ադրբեջանը չէր կարող բացահայտ թույլատրել թուրքական ռազմաբազաների տեղակայումը երկրի տարածքում, քանի որ դա հակասում է սահմանադրությանն ու ռազմական դոկտրինին, իսկ իրականում չէր ցանկանա բորբոքել ՌԴ-ին ու Իրանին: Մոսկվան, որն այժմ ռազմական ոլորտում սերտ, ռազմավարական կապեր ունի Բաքվի հետ չէր ցանկանա իր հարևանությամբ ունենալ թուրքական ռազմաբազաներ՝Կասպյան-Կովկասյան տարածաշրջանում:
Իրանը նույնպես, որը Ադրբեջանի հետ իրականացնում է խոշոր էներգետիկ-տրանսպորտային նախագծեր կտրուկ կարձագանքեր թուրքական ռազմակայանների կառուցմանն Ադրբեջանի տարածքում՝չնայած թուրքական ռազմական անգամ այսպիսի փոքր ներկայությունը չի կարող անարձագանք մնալ Մոսկվայում և Թեհրանում: Պատահական չէ, որ Ադրբեջանի ՊՆ-ը օպերատիվ կերպով հերքեց Ադրբեջանում Թուրքիայի ռազմակայաններ ստեղծելու մասին լուրերը՝բացատրելով, որ դրանք դասական իմաստով ռազմակայաններ չեն, այլ թուրքական զինտեխնիկայի սպասարկման և մասնագետների ժամանակավոր տեղակայման վայրեր:


Արտյոմ Բալասանով