Շատ հետաքրքրական և ուշագրավ են պաշտոնական Ստեփանակերտի և Դաշնակցության ներկայացուցչի մեկնաբանությունները ապրիլյան ռազմագործողության ընթացքում կորսված տարածքների վերաբերյալ: ԼՂՀ նախագահի խոսնակն ասում է, որ ադրբեջանական կողմն իր վերահսկողության տակ է առել չեզոք/անվտանգության գոտում գտնվող հայկական մի շարք դիրքեր/տարածքներ, իսկ Դաշնակցության հարգարժան ներկայացուցիչ Արմեն Ռուստամյանն էլ ասում է, որ շփման գծի մասին է խոսքը, իսկ այդ գիծն անընդհատ փոխվել է և դեռ կարող է փոխվել: Այն տպավորությունն է ստեղծվում, որ մարդիկ նպատակային կերպով ձգտում են փչացնել ու չեզոքացնել ԼՂՀ Սահմանադրությամբ ամրագրված Արցախի տարածքային ամբողջականության վերաբերյալ դրույթը: Իսկ, եթե չեմ սխալվում, Արցախի հիմնական օրենքի համաձայն, երկրի սահմանադրական տարածք է համարվում ԼՂՀ իշխանությունների վերահսկողության տակ գտնվող ողջ տարածքը՝ այսինքն ԼՂՀ իրական սահմանն անցնում է այն ռազմական դիրքերով ու խրամատներով, ուր կանգնած է եղել ԼՂՀ ՊԲ զինվորը:

Ուստի բոլոր այն դեպքերում, երբ այդ զինվորը հակառակորդի հարձակման արդյունքում ստիպված է եղել նահանջել, նա ոչ թե ինչոր անտեր-չեզոք-անվտանգության գոտի է թողել հակառակորդին, այլ սեփական երկրի՝ Հայրենիքի տարածքը: Ըստ պարոն Սերժ Սարգսյանի, հակառակորդն իր ռազմական ու, հետևաբար, նաև վարչական վերահոսկողությունն է սահմանել Արցախի մոտ 800 հեկտար տարածքի նկատմամբ և ես շատ մտերմաբար կհորդորեի իմ կողմից իրապես շատ հարգված պաշտոնատարներին ստեղծված իրավիճակը բնութագրող ճշգրիտ և համարժեք ձևակերպումներ օգտագործել: Պարոն Սերժ Սարգսյանն, այդ առումով, անհրաժեշտ նախապայմանները ստեղծել է իր՝ օդում տված հարցազրույցով:

Արման Մելիքյան