Հրանտ Բագրատյանը Սաթիկ Սեյրանյանի հաղորդման ժամանակ հայտարարել է, որ Հայաստանը ԵԽԽՎ-ում պարտվել է, ուղղակի՝ 2-0-ի փոխարեն, 1-0 է պարտվել: Անկեղծ ասած, ես մաթեմատիկայից լավ չեմ, ի տարբերություն՝ նախկին վարչապետի, ով մաթեմատիկայից շատ լավ է, ոչ էլ ԵԽԽՎ-ում եմ մասնագետ, ինչպես եւ Հրանտ Բագրատյանն, ի դեպ, բայց սպորտից, մանավանդ՝ ֆուտբոլից լավ եմ: Ուրեմն այսպես, եթե երկու բանաձեւերն էլ ԵԽԽՎ-ն ընդուներ, ստացվում է, որ Ադրբեջանը կհաղթեր՝ 2:0 հաշվով:

Իսկ, եթե երկու բանաձեւերն էլ չընդունե՞ր, մի՞թե կլիներ՝ 0:0, այսինքն մի՞թե ԵԽԽՎ-ում եթե կարող էր որեւէ մեկը հաղթել, ապա դա բացառապես Ադրբեջանն էր, այսինքն արդյո՞ք ԵԽԽՎ-ում բանաձեւերի չընդունումը Հայաստանի հաղթանակ չէր նշանակի: Տրամաբանական է, որ եթե ընդունումը Ադրբեջանի հաղթանակն է, ապա չընդունումը՝ Հայաստանի հաղթանակը պետք է լինի:

Հետեւաբար, քանի որ ԵԽԽՎ-ն արդյունքում երկու բանաձեւերից մեկը չի ընդունել, մեկն ընդունել է, նշանակում է խաղում մի անգամ գոլ է խփել Ադրբեջանը, մի անգամ՝ Հայաստանը, այսինքն ոչ թե Հայաստանը պարտվել է 1:0, այլ արձանագրվել է՝ ոչ ոքի՝ 1:1: Եթե, իհարկե, կրկնում եմ, Ադրբեջանի պարտությունը Հայաստանի հաղթանակն ՝ ինքըստինքյան:

Հովիկ Աֆյան