Գաղտնիք չէ, որ գյուղատնտեսության զարգացման ու մշակվող տարածքների ավելացման գործում մեծ ազդեցություն ունի ոռոգման ջրի առկայությունը: Հատկանշական է, որ այս տարում հանրապետությունում իրականացվելու են աշխատանքներ՝ ուղղված ջրամատակարարման տևողության աստիճանական ավելացմանը, ջրի կորուստների կրճատմանը, Արմավիր և Մեծամոր քաղաքների համար կեղտաջրերի մաքրման կայանների կառուցման նախապատրաստական աշխատանքների իրականացմանը, ջրամատակարարման և
ջրահեռացման ոլորտներում շուրջ 300 կմ ջրագերի և կոյուղագծերի վերանորոգմանն ու կառուցման աշախատանքների իրականացմանը:
Հարկ է նշել նաև, որ կառավարությունը նախատեսում է 2016 թվականին վերակագնել Արփա­-Սևան թունելի առանձին վթարված հատվածները:

ՀՀ գյուղատնտեսության նախարարության ջրային տնտեսության պետական կոմիտեի հրապարակման համաձայն՝ գերակա խնդրի անհրաժեշտությունը պայմանավորված է հանրապետության մի շարք քաղաքների և գյուղական բնակավայրերի ջրամատակարարման բարելավմամբ, մատակարարվող խմելու ջրի որակի ապահովմամբ, կայուն և հուսալի ջրամատակարարումով, ջրի կորուստների կրճատումով, ջրամատակարարման տևողության աստիճանական ավելացմամբ, նոր վարկային ծրագրերի ներգրավման շուրջ բանակցությունների վարումով:
Վերը նշած խնդրի լուծման դեպքում ակնկալվում են ջրամատակարար կազմակերպությունների կողմից սպասարկվող տարածքներում հուսալի և անվտանգ խմելու ջրի մատակարարման հասանելիության ապահովում, բնակավայրերի ջրամատակարարման ներդրումային ծրագրերի մշակում և իրականացում։ Գործող վարկային և դրամաշնորհային ծրագրերի շրջանակներում կիրականացվեն մի շարք քաղաքային և գյուղական բնակավայրերի ջրամատակարարման բարելավման կոյուղաջրերի մաքրման կայանների շինարարական աշխատանքներ։ «Արփա­Սևան» թունելների վերականգնման վարկային ծրագրի շրջանակներում նախատեսվում է իրականացնել գետերից Սևանա լճի մակարդակի բարձրացման և բնապահպանական կայունության պահպանման նպատակով Սևանա լիճ ջուր տեղափոխող Արփա­Սևան հիդրոհամակարգային թունելի որոշ հատվածների վերականգնումը, վերանորոգումը և շինարարությունը։

Հատկանշական է, որ 2015 թվականի նոյեմբերի 6-­ին ՀՀ վարչապետ Հովիկ Աբրահամյանը այցելել էր «Արփա­Սևան» թունել՝ տեղում ծանոթացել թունելի վիճակին և վերականգնման աշխատանքներին ընթացքին:
ՀՀ կառավարության համաֆինանսավորմամբ և Աբու­Դաբիի Զարգացման Հիմնադրամի աջակցությամբ 2010-­2017 թթ. իրականացվում է «Արփա-Սևան» թունելի առավել վթարային հատվածների հիմնանորոգման ծրագիր, որի նպատակն է՝ ապահովել Արփա­Սևան ջրատարի թունելների կայունությունը և անվտանգությունը ջրատարի ուղեծրի ողջ երկարությամբ:
Հիշյալ ծրագրի իրականացման արդյունքում ակնկալվում է թունելի՝ տեխնիկական վիճակից կախված թողունակությունը 13.5 մ³/վրկ­-ից հասցնել շուրջ 20 մ³/վրկ, որը հնարավորություն կտա տարեկան Սևանա լիճ տեղափոխել շուրջ 270 մլն մ³ ջրաքանակ:

Արմեն Վարդանյան