Կրակ է բացվել Դ-30 հրանոթից (հաուբից). Իրավիճակն առավել վտանգավոր է դառնում
Շփման գծում կիրառված զինատեսակներն ու օգտագործված զինամթերքի քանակը ցույց են տալիս, որ նախագահների հանդիպումից 1 օր անց Ադրբեջանի գործողություններն առավել վտանգավոր են դառնում:
Մասնավորապես ԼՂՀ ՊԲ փոխանցմամբ, դեկտեմբերի 20-ին և լույս 21-ի գիշերը ղարաբաղա-ադրբեջանական հակամարտ զորքերի շփման գծում տեղի ունեցած զինված բախումների ընթացքում հակառակորդի կողմից տարբեր տրամաչափի հրաձգային զինատեսակներից, ինչպես նաև 60 /236 արկ/, 82 /155 արկ/, 120 /23 արկ/ միլիմետրանոց ականանետերից, ՀԱՆ-17 /4 արկ/ և ՌՊԳ-7 /3 արկ/ տիպի նռնականետերից, TR-107 տիպի հրթիռային կայանքից /24 արկ/, հայ դիրքապահների ուղղությամբ արձակվել է ավելի քան 1700 կրակոց: Հակառակորդը շփման գծի հարավային (Հադրութ) ուղղությամբ կիրառել է նաև 122 միլիմետրանոց Դ-30 հաուբից հրանոթ /4 արկ/:

Մինչ համանախագահ երկրները առաջարկում են դիպուկահարներին դուրս բերել առաջ գծից, այդ առաջարկը վերանայել-թարմացնելու անհրաժեշտություն է առաջացել, որովհետև առաջնագծում «գործի» է անցել ծանր հրետանին: Օրակարգում առաջին հերթին պետք է լինի ծանր տեխնիկայի դուրս բերումը, որի կիրառումն առավել վտանգավոր է բնույթ է կրում:
Շփման գծում տեղի ունեցող հետաքննության մեխանիզմի ներդրումը կարևոր քայլ կլինի Ադրբեջանի սադրանքները զսպելու առումով, այս տեսանկյունից, միջազգային հանրությունը պետք է իր բոլոր ջանքերն կենտրոնացնի այս համակարգի ներդրման ու կիրառման ուղղությամբ:

Տիգրան Աբրահամյան