
Եկեղեցական տարբեր տոներին հաջորդող երկուշաբթի օրերը մեռելոց ու ոչ աշխատանքային օր հայտարարել չհայտարարելու խնդիրը մշտապես քննարկումների առիթ է հանդիսացել:
Այսօր կառավարությունում տեղի ունեցած արտահերթ նիստում որոշվել է Վարդավառի տոնին հաջորդող երկուշաբթի օրը հայտարարել ոչ աշխատանքային օր: Այնուամենայնիվ հանձնարարվել է ԴԱՀԿ ծառայությանը, ՀՀ կադաստրի պետական կոմիտեի ստորաբաժանումներին և ՀՀ ոստիկանության անձնագրային և վիզաների վարչությանը հուլիսի 13-ին պահպանել աշխատանքային ռեժիմը: Ինչպես նաև ՀՀ ԿԲ-ին առաջարկվել է քայլեր ձեռնարկել, որպեսզի հուլիսի 13-ին բանկերը ևս ծառայություններ մատուցեն քաղաքացիներին:
Աշխատանքային օր լինել չլինելու համար հակասական կարծիքներ են հնչում եկեղեցու և գործարարների կողմից.
Գործարարները նշում են, որ ոչ աշխատանքային օր լինելու փաստը հարվածում է իրենց բիզնեսին, քանի որ հիմնականում արտաքին գործընկեր ունեցող կազմակերպությունները իրենց հետ համագործակցող արտերկրյա գործարարներին չեն կարողանում հստակ հիմնավորել թե ինչու պետք է այս կամ այն գործարքը հետաձգել:
Իսկ եկեղեցին էլ պնդում է, որ մենք լինելով քրիստոնյա արժեքներ կրող հասարակություն, ինչպես նաև առաջինը քրիստոնեությունը, որպես պետական կրոն ընդունած երկիր եկեղեցական տոներին հաջորդող օրերը պետք է ամրագրենք որպես ոչ աշխատանքային:
Երկու կողմերն էլ բերում են փաստարկներ, որոնք ունեն օբյեկտիվ պատճառներ, ուստի հուսանք, որ լայն քննարկումները կտան իրենց արդյունքը և կգտնվեն ամենաօպտիմալ ու ճիշտ լուծումներ:
Վաչագան Գևորգյան