Սիրիայի հյուսիսում, արևելքում և կենտրոնում զգալի տարածքների վրա վերահսկողություն սահմանելուց հետո «Իսլամական պետություն»(ԻՊ) իսլամական ծայրահեղ արմատական կազմակերպությունը շարժվում է դեպի երկրի հարավային և հարավ-արևմտյան նահանգներ՝ Դարաա և Կունայտրա, որոնք անմիջականորեն սահմանակցում են Հորդանանին և Իսրայելին: Այս ուղղությամբ իսլամականներին սպասվում է կրկնակի դիմակայություն՝ մի կողմից կառավարական ուժերի, ապա նաև՝ սիրիական ընդդիմադիր տարաբնույթ հակակառավարական խմբավորումների կողմից. վերջիններին լայնորեն աջակցում են ինչպես արևմտյան, պետությունները, Պարսից ծոցի արաբական միապետությունները, Թուրքիան, այնպես էլ՝ մասամբ Իսրայելը:
Իրենց նոր թիրախների դեմ ուղղակի ռազմագործողություններ նախաձեռնելուց առաջ ԻՊ-ն, ընդունված մարտավարության համաձայն, դիմել է վերոնշյալ նահանգների բնակչությանը՝ կոչ անելով բոլոր նրանց, ովքեր դեռ չեն կանգնել «անհավատ Արևմուտքի» հովանավորությամբ գործող զինյալների կողքին, «միանալ իրենց, համալրել կառույցի շարքերը՝ հանուն Ալլահի մղվող պատերազմում»:
Վերոնշյալ տեղեկատվությունը հատկապես մտահոգիչ է Իսրայելի համար, քանի որ ներկայում իսլամականների դիրքերը գտնվում են սիրիա-իսրայելական սահմանի մերձակայքում գտնվող ալ-Կունայտրա քաղաքից ընդամենը 50-60 կմ հեռավորության վրա:
Արմեն Պետրոսյան
