Իրանական մամուլի համաձայն, Իրանի հոգեւոր առաջնորդ Այաթոլլահ Ալի Խամենեիի գրասենյակի ներկայացուցիչները երկու օր շարունակ այցելել են երկրի միջուկային՝ Ֆորդո, Նաթանզ ու Սպահանի հիմնարկներ ու մանրակրկիտ ուսումնասիրել են հիշյալ կենտրոններում տեղի ունեցող աշխատանքները:
Լրատվության մեջ նշված չէ այցելության հիմնական նպատակը, բայց իրանական մամուլը հետեւելով կարելի է ենթադրել, որ հոգեւոր առաջնորդի ներկայացուցիչների նպատակը միջուկային հիմնարկներ այցելելուց այն է, որ օրեր առաջ խորհրդարանի մի շարք պատգամավորներ հայտարարություն էին տարածել այն մասին, որ միջուկային հիմնարկների աշխատանքների մեծ մասը կասեցվել է՝ Ժնեվում ձեռք բերված ժամանակավոր համաձայնության հիման վրա: Ըստ երեւույթի, Իրանի հոգեւոր առաջնորդը ցանկացել է մանրակրկիտ տեղեկություն ստանալ միջուկային հիմնարկների աշխատանքների մասին:
