Գեղարքունիքի մարզում հոկտեմբերի 7-ին տեղացած ձյունը վնաս է հասցրել բանջարաբոստանային և այլ մշակաբույսերի ցանքերին: Ինչպես տեղեկացնում է Գավառի քաղաքապետարանի մամուլի քարտուղար Նոնա ԽԱՉԻԿՅԱՆԸ, ձյունը նստել է մոտ 40-50 սմ հաստությամբ: Ձյան տակ մնացած կաղամբի, կարտոֆիլի ցանքերի թիվը, որոնք դեռ չէին հասցվել հավաքվել տեղաբնակների կողմից, հասնում է մի քանի հազար հեկտարի:
Պարզվում է, այս տարվա առաջին ձյունից տուժել են ոչ միայն տնտեսությունները, այլև ճանապարհային երթևեկությունը: Մարզի որոշ հատվածներում ձյան հաստությունը հասել է մոտ մեկ մետրի, որի հետևանքով առաջացել են ավտոմեքենաների խցանումներ: Շուրջ 35 ավտոմեքենա մնացել է ձնակույտերի տակ, որոնց օգնություն է ցուցաբերել մարզային փրկարարական ծառայությունը: Արձանագրվել են ավտովթարի մեկ դեպք և այլ պատահարներ:
Հասմիկ ՄՈՎՍԻՍՅԱՆ