Քունը կենսաբանական անհրաժեշտություն է: Քնի ժամանակ օրգանիզմի բոլոր օրգանների և համակարգերի գործունեությունը դանդաղում է' դրանով հնարավորություն ունենալով հանգստանալ և «լիցքաթափվել»' հետագա արթուն մնալու պահանջներին պատասխանելու համար: Խոր և բավարար քունը կնոջը երիտասարդացնում է և գեղեցկացնում, մաշկի արյան մատակարարումը լավանում է' այն դառնում է վարդագույն և թարմ, աչքերը փայլում են, շարժումները հանգիստ են ու ներդաշնակ: Ահա թե ինչու լավ քունը բոլոր կոսմետիկական նախաձեռնումների հաջողության երաշխիքն է:
Չափահաս մարդը, կախված նյարդային համակարգի տեսակից, կարիք է զգում 6-10 ժամվա քնի, ընդ որում ծերանալու հետ դրա նկատմամբ պահանջը պակասում է: Եթե մարդը մշտապես քունը չի առնում սկսվում է քնկոտության և թուլության վիճակ:
Պետք է հիշել, որ ամենաառողջ քունը մինչև կեսգիշերն է: Աշխատեք քնել ժամը 22:00-22:30-ից ոչ ուշ, և այն էլ խիստ որոշակի ժամի: Եթե դա դառնա սովորություն, ստեղծված պայմանական ռեֆլեքսը կնպաստի արագ քնելուն սովորական, անփոփոխ պայմաններում: Ժամանակին ննջելու և լիարժեք ու բավարար քուն ապահովելու համար անհրաժեշտ է պահպանել հետևյալ կանոնները.
Քնեք պատուհանը բաց կամ գոնե լավ օդափոխված սենյակում:
Ինչպես քաղցը, այնպես էլ երեկոյան չափից ավելի ուտելը կարող են քնի խանգարման պատճառ դառնալ: Ահա թե ինչու աշխատեք երեկոյան քիչ ուտել' սննդակարգից հանելով ճարպոտ և դժվարամարս ուտելիքը:
Քնելուց առաջ հոգեկան վիճակը շատ կարևոր է: Գրգռված, զայրացած, վիրավորված, վրդովված մարդը տառապում է անքնությամբ, իսկ երբ նրան այնուամենայնիվ հաջողվում է ննջել, նրա քունը անհանգիստ է, ուղեկցվում է մղձավանջներով: Այդ պատճառով աշխատեք նախքան պառկելը ազատվել բոլոր հոգսերից և հանգստանալ: Լսեք հանգստացնող ցածր երաժշտություն, ընդունեք տաք ջրցող, բաց պատուհանի առջև մի քանի անգամ խորը ներշնչեք և արտանշեք:
Քնելուց առաջ խուսափեք կարդալ լարվածություն առաջացնող գրքեր կամ դիտել հեռուստատեսային հաղորդումներ: Եթե քնելուց առաջ կարդալու սովորություն ունեք, ընտրեք թեթև և հետաքրքիր բովանդակությամբ որևէ գիրք:
Եթե քնել եք ուզում, անմիջապես պառկեք, անկախ այն բանից, թե որքան հետաքրքիր է հեռուստատեսային հաղորդումը կամ գիրքը: Իսկ հաղթահարելով քունը և պահպանելով արթուն վիճակը' դուք փարատում եք այն, որից հետո դժվարությամբ եք ննջում, իսկ առավոտյան ձեզ հոգնած եք զգում: Սուրճը, թեյը, ալկոհոլը և ծխախոտը գրգռում են նյարդային համակարգը, խանգարում քնելուն, ուստի խուսափեք դրանք երեկոյան օգտագործելուց:
Քնելու համար ձեզ համար ընտրեք առավել խաղաղ սենյակ: Քնած վիճակում ևս մենք ենթարկվում ենք մեր շրջապատի աղմուկի ազդեցությանը, որը թեև մեզ չի արթնացնում, այնուամենայնիվ խանգարում է քնի ռիթմը: Եթե դուք ապրում եք աղմկոտ փողոցում, քնելուց առաջ ականջների մեջ դրեք մի փոքր բամբակ:
Առողջ քնի համար անհրաժեշտ է, որպեսզի ննջասենյակը լինի մութ: Եթե ձեզ չի հաջողվում սենյակը մթնեցնել, օգտվեք աչքերին դրվող թեթև ժապավենից:
Լավ քնելու համար հրաշալի միջոց է դրանից առաջ կեսջամյա զբոսանքը:
Մահճակալը պետք է լինի բավական երկար և լայն, ոչ այնքան չոր, բայց ոչ այնքան փափուկ:
Եթե շաբաթվա ընթացքում ժամանակ չի եղել բավարար քնի համար, այդ դեպքում շաբաթ կամ կիրակի օրերը աշխատեք 1-2 ժամ հատկացնել հետճաշյա քնին, որը ձեզ լիովին վարձահատույց կլինի առողջությամբ և գեղեցկությամբ:
Անքնության դեպքում անմիջապես մի դիմեք քնաբեր դեղամիջոցների, քանզի հաճախակի օգտագործումը դառնում է սովորություն և կախվածություն, և անընդհատ ավելանում է դրանց չափաքանակը: Իսկ քնաբեր միջոցների շատ չափաքանակը չի ապահովում իսկական առողջ քուն, այլ միայն ներկայացնում նարկոզի տեսակ, որի դեպքում բացակայում է նորմալ քնի վերականգնողական հատկությունը: Քնաբեր հաբերի փոխարեն երեկոյան քնելուց առաջ խմեք մեկ բաժակ թարմ տաք կաթ մեկ գդալ մեղրով:
