Իսլամիստ զինյալներին իրենց առաջարկելու նպատակով Սիրիա գնացած թունիսցի կանայք ապստամբներից հղիացած վերադարձել են իրենց երկիր: Թունիսի կառավարության նախարարներից մեկը այս շաբաթ պառլամենտի անդամներին տեղեկացրել է, որ սեքսուալ ջիհադ կատարող կանայք՝ նախքան հղի վիճակում Թունիս վերադառնալը, սեռական հարաբերություններ են ունեցել 20, 30, 100 տղամարդու հետ: Ներքին գործերի նախարար Լոտֆի բեն Ջեդուն պառլամենտին այդ մասին տեղեկացրել է հինգշաբթի, սակայն հղի կանանց թվաքանակը չի հայտնել: Սեքսուալ ջիհադը, որը թույլատրում է բազմաթիվ զուգընկերների հետ արտաամուսնական հարաբերություններ ունենալ, որոշ սունի մահմեդական սալաֆիստներ համարում են սրբազան պատերազմի օրինական ձև: Նախարարը չի տեղեկացրել նաև, թե քանի թունիսցի կին է Սիրիա մեկնել այդ նպատակով՝ չնայած մամուլում տարածվել էր, որ հարյուրավոր կանայք են այդ քայլին դիմել: Բեն Ջեդուն հայտնել է, որ ինչ ինքը մարտին դարձել է նախարար, վեց հազար երիտասարդի արգելել են այդ նպատակով դուրս գալ երկրից: Նախկինում նա նշել էր, որ սահմանային վերահսկումը խստացվել է երիտասարդ թունիսցիներին Սիրիա մեկնել թույլ չտալու համար: Այս տարվա սկզբին թունիսցի աղջիկների խումբ էր մեկնել ապստամբենրի իշխանության տակ գտնվող հյուսիսային Սիրիայի շրջաններ՝ ընդդիմության զինյալներին իրենց առաջարկելու համար: Նրանց այս քայլը Թունիսում մտահոգության տեղիք էր տվել կրոնական կանոնների կամ ֆատվաների նկատմամբ, որոնք, համացանցում շրջանառվելով, մահմեդական կանանց կոչ են անում սեքսի միջոցով ջիհադ իրականացնել: Թունիսի կրոնական հարցերով նախարարը այդ ժամանակ, դիմելով կանանց, այդ քարոզչության ազդեցության տակ չընկնելու կոչ է արել: Կրոնական հարցերով նախարար Նուրեդին ալ-Խադիմին, մերժելով սեքսուալ ջիհադի ֆատվաները, Թունիսի ժողովրդին և պետական կառույցներին դրանց չարձագանքելու կոչ էր արել:
