«Սպառողների ազգային ասոցիացիա» ՀԿ ղեկավար Արմեն Պողոսյանը թեև չունի տվյալներ, թե հայտնի բրենդային խանութներն այսօր ում են պատկանում, կամ թե ովքեր են դրանց հետևում կանգնած, բայց համոզված է, որ դրանց տերերը հայտնի մեծահարուստներն ու օլիգարխներն են: Mardik.am-ի թղթակցի հետ զրույցում նա նշեց, որ այդ խանութների հիմնադիրները կամ հայտնի բիզնեսմեններն են, կամ նրանց կանայք ու աղջիկները: Թե, ինչու են Հայաստանում այդպիսի խանութներում ապրանքների գներն աստղաբաշխական թվեր կազմում, փորձագետը պարզաբանեց նրանով, որ դրանք որակապես տարբերվում են մյուս խանութներում վաճառվող ապրանքատեսակներից: Իսկ թե որքանո՞վ' փորձագետը կրկին չկարողացավ հստակ պատասխան տալ: Մեր հարցին, թե սպառողն այսօր որքանով է հետաքրքրվում այդպիսի խանութներով' նա նշեց, որ հետաքրքրություն ամեն դեպքում կա: «Իհարկե հետաքրքրվում են: Այդ խանութներից օգտվում են այն անհատները, ովքեր ունեն ֆինանսական հզոր միջոցներ: Դրանք այն մարդիկ են, որոնց մոտ վճարունակության խնդիր չկա: Հայաստանում այդպիսի մարդկանց թիվը կազմում է մոտավորապես 10-12%»,- ասաց նա շարունակելով, որ այդպիսի մարդկանց համար գինը նշանակություն չունի' նրանք կարևորում են որակը: Մեր դիտարկմանը, թե որքանով են դրանք հուսալի, հաշվի առնելով այն հանգամանքը, որ այստեղ ամեն ինչ կեղծվում է, նա նշեց . «Դրանց որակն անհամեմատ ավելի բարձր է և դրանց նկատմամբ վստահությունն ավելի մեծ: Բայց այս աշխարհում բացարձակ բան չկա: Մենք բրենդային խանութներից էլ ենք բողոքներ ստանում, բայց իբրև կանոն' այդ խանութներում որակյալ ապրանքներ են վաճառվում»,- ասաց նա:
Անդրադառնալով հարցին, թե ինչպես են Հայաստանում այդ խանութները վերահսկվում, եթե հաշվի առնենք այն հանգամանքը, որ Հայաստանում բիզնեսմենների ու օլիգարխների համար կան մշակված հատուկ կանոններ' (զորօրինակ այն, որ մեր ԱԺ պատգամավորների մեծամասնությունն այսօր մեր օլիգարխներն են-mardik.am), Ա. Պողոսյանը նշեց, որ ըստ էության կանոններն ու արտոնությունները պետք է որ հավասար լինեն, բայց. «Բոլորի համար էլ պահանջները նույնն են, բայց այստեղ մեծ դեր է խաղում այն հանգամանքը, որ նրանց լծակներն ավելի մեծ ու հզոր են: Նրանք կարողանում են նաև որակյալ մասնագետներ վարձել: Այդ խանութների տերերն ինձ երբեք չեն հետաքրքրել, և, բնականաբար, դրանց մեծ մասն այսօր պաշտոնյաներն ու բիզնեսմեններն են, և իհարկե օրենքը նրանց համար մի փոքր այլ կերպ է գործում»,- ասաց նա շարունակելով, որ իհարկե այդ «խանութպանների» համար կան սահմանված հատուկ արտոնություններ: Ա. Պողոսյանի պարզաբանմամբ' նրբությունը հետևյալն է. «Բնական է, որ իրենց խելքն ու ինտելեկտն այդտեղ չի հասնում, բայց նրանք այնքան են գիտակցում, որ որակյալ մասնագետներ են հրավիրում: Հենց այդ ֆակտորն է, որ ապրանքի որակի բարձր լինելն ապահովում է ու նա կարողանում է իր բիզնեսը շարունակել»,- նշեց Ա. Պողոսյանը շեշտելով, որ ով էլ լինի' ակնհայտ է, որ այդ խանութների հետևում կանգնած են շատ հզոր մարդիկ: «Միանշանակ և՛ փողով են հզոր, և՛ կարողություններով, և՛ ազդեցությամբ»,- նշեց փորձագետը չբացառելով նաև, որ այսօր կան խանութներ, որ հենց ֆիման է իր մասնաճյուղը Հայաստանում բացել: «Չի բացառվում, որ դա նաև այդպես լինի»:
Թեև չկարողացանք որևէ ստույգ տվյալներ իմանալ սեփականատերերի մասին, բայց նկատենք, որ ԱԺ բոլոր պատգամավորներն իրենց կարողությունները գրանցել են կանանց կամ աղջիկների անուններով: Զորօրինակ 'տիկին Շողերինա Ալեքսանյանը, ով համարվում է թիվ մեկ «բիզնես լեդին» Հայաստանում:
