Գիտնականները բացատրել են, թե ինչ է կատարվում մեր գլխում՝ սիրով զբաղվելու ընթացքում
Սեքսը կարող է ոչ միայն երեխաների ծննդի, հարսանիքի, երջանկության կամ օրգազմի, այլև սրտի նոպայի, բարդույթների և վախերի պատճառ դառնալ: Ինչո՞ւ' սա է հանելուկը: Ի՞նչ փոփոխություններ են կատարվում մեր ուղեղում այդ պահերին:
Նյու Ջերսիի Ռութգերս համալսարանի գիտնականներին հաջողվել է օրգազմի ժամանակ սկանավորել կնոջ ուղեղը և պարզել, թե մարմնի այս կամ այն մասի գրգռվածության դեպքում ուղեղի հատկապես որ մասերն են սկսում աշխուժորեն գործել: Մասնակցում է ուղեղի 30 մաս, որոնք պատասխանատու են զգացմունքների, հաղորդակցության, ուրախության, բավականության և հիշողության համար:
Հետազոտությունը ցույց է տվել, որ օրգազմից երկու րոպե առաջ աշխուժանում են ուղեղի այն կենտրոնները, որոնք գրգռվում են ուտելիս ու խմելիս: Ամենապատասխանատու պահին ակտիվանում է ուղեղի այն մասը, որը պատասխանատու է ջերմության, սովի և ծարավի զգացողության համար:
Հետաքրքիր է' իսկ ի՞նչ է տեղի ունենում տղամարդու ուղեղում՝ սեքսի ժամանակ: Գիտնականները չեն հրաժարվում նաև դա պարզելու հույսից:
Ինչո՞ւ է սերը կույր
Սեռական հարաբերությունների ժամանակ «ղեկավարող» հիմնական հորմոնը օքսիտոցինն է (ի դեպ, այս նույն հորմոնն է գործում նաև ծննդաբերությանժամանակ), կոչվում է նաև«գրկախառնության» հորմոն:
- Օքսիտոցինը մեզ ավելի դյուրահավատ է դարձնում, ստիպում է վստահել, անկեղծանալ,- ասում է բժիշկ Արան Գոշը' Լիվերփուլի հիվանդանոցի սեռական առողջության մասնագետը: Այդ նույն հորմոնն ամրապնդում է տղամարդու ու կնոջ կապը' մեծացնելով փոխադարձ համակրանքը: Եվ քանի որ օքսիտոցինը կանացի հորմոն է, հենց կանանց է բնորոշ' զուգընկերոջ հանդեպ բուռն համակրանք զգալու և սեքսից հետո սիրահարվելու սովորությունը:
Միայն ափսոս, որ հորմոնի համար միևնույն է' այդ զուգընկերը պատահական մե՞կն է, թե հարմար թեկնածու՝ ամուսնության համար: Օքսիտոցինի ներգործությունն անփոփոխ է, նույնիսկ եթե կինն այդ տղամարդուն ընդամենը մի քանի ժամ է ճանաչում:
«Սիրելիս, ես քեզ սիրում եմ»,- ասում է կինը: «Իսկ ես, սիրելիս, քնել եմ ուզում»,- լսում է ի պատասխան:
Ահա այսպես: Եվ պետք չէ զարմանալ, թե ինչու է գեղեցկուհին լավ սեքսից հետո սկսում ապագա երեխաների համար անուններ ընտրել և պատրաստվել ամուսնության, նույնիսկ եթե զուգընկերը նման մտադրություն չունի: Այդ ամենը օքսիտոցինի ներգործությունն է: Եվ հենց դա է պատճառը, որ կնոջ համար այդքան վիրավորական և ցավալի է, երբ ավարտվում են թեկուզև ոչինչ չխոստացող հարաբերությունները:
Որքան սեքսը լավն է՝ այդքան կինն ավելի արագ ու ուժգին է սիրահարվում և այնքան դժվար է նրա համար տղամարդուց հրաժարվելը, նույնիսկ եթե նա ամենևին էլ չի համապատասխանում կյանքի ուղեկցի դերին:
Իսկ տղամարդի՞կ: Նրանց համար ամեն ինչ շատ ավելի հեշտ է. սեքսից հետո նրանց հորմոնները ոչ թե ամրապնդում են կապը կնոջ հետ, այլ ընդամենն ազդարարում բավականության մասին: «Դու քեզ լավ էիր զգում»,- ասում են տղամարդու հորմոնները:
Օրգազմից հետո տղամարդուն ղեկավարում է դոպամինը, - բացատրում է բժիշկ Գոշը,- բավականության հորմոնը: Եվ տղամարդը կարող է պարզապես կախման մեջ ընկնել այդ զգացողությունից, ավելի ու ավելի զգալով դրա պահանջը:
Որքան մեծանում ենք' այնքան սեքսի կարիք շատ ենք ունենում:
Համբույրների շնորհիվ սեքսն ավելի հաճելի է դառնում
Մեր շուրթերի վրա հարյուր անգամ ավելի շատ նյարդային վերջույթներ կան, քան մատների բարձիկների:
Հենց այդ պատճառով էլ համբույրները թուլացնում են, ուղեղի մեջ գործի դնում մեխանիզմ, որը լավացնում է տրամադրությունը և տրամադրում սեքսի' մարդուն դարձնելով ավելի զգայուն:
Եվ այսպես՝ արդեն պարզեցինք, որ սեքսն անփոխարինելի է: Բացի հիշողությունը, ընկալունակությունը լավացնելուց, մեզ ավելի ուշադիր, զգայուն և երջանիկ դարձնելուց՝ այն նաև բնական ցավազրկողի դեր է կատարում, կանխարգելում ծերունական տկարամտությունը, երաշխավորում ամուր հարաբերությունները:
Այնպես որ եթե ընկճված եք, ցրված ու հոգնած, մի կարծեք, թե «հիմա սեքսի ժամանակը չէ»: Հենց ճիշտ ժամանակն է, որ կա:
Չմոռանանք նշել նաև, որ սեքսը հրաշալի միջոց է անքնության դեմ:
- Տղամարդու համար օրգազմն իր ներգործությամբ համազոր է 2-3 մգ վալիումի (հանգստացնող և քնաբեր միջոց),- ասում է բժիշկ Գոշը:
Այնպես որ, սիրելի կանայք, մի վիրավորվեք տղամարդկանցից, երբ նրանք սեքսից հետո քնով են անցնում: Դա նրանց ֆիզիոլոգիական պահանջն է: Եվ հավանաբար նրանք քնով են անցնում շատ երջանիկ:
