10:13
«Իրականում ոչ մի հաջողություն մենք չեն գրանցել ՀԱՊԿ գլխավոր քարտուղարի հարցում». Նաիրի Հոխիկյան

Միջէթնիկ հակամարտությունների փորձագետ Նաիրի Հոխիկյանը ֆեյսբուքյան իր էջում գրել է․

«Հայկական մի շարք լրատվամիջոցներ այսօր տարածեցին տեղեկություն, թե Հայաստանը կարողացավ սկզբունքային լինել ու պահել ՀԱՊԿ գլխավոր քարտուղարի քվոտան: Նույնիսկ եղան «Հայաստանի զուսպ հաղթանակը» «Հայաստանը չզիջեց» և նման նվաճողական վերնագրեր:

Հիմա, ըստ էության, իրականում ոչ մի հաջողություն մենք չեն գրանցել ՀԱՊԿ գլխավոր քարտուղարի հարցում, քանի որ գործընթացն ընթանում է այնպես, ինչպես պետք է լիներ:

Ըստ կանոնադրության` ՀՀ ներկայացուցիչը պետք է ղեկավարեր մինչև 2020թ. մայիս: Յուրի Խաչատուրովին հետ կանչելուց հետո գլխավոր քարտուղարի ժամանակավոր պաշտոնակատար նշանակվեց ՌԴ ներկայացուցիչ Սեմերիկովը: Հենց նա էլ կշարունակի պաշտոնավարել մինչև հունվար: Այդ դեպքում ո՞րն է Հայաստանի կողմից քվոտայի պահպանումը:

Ավելին` եկող տարվա հունվարից կամ մայիսից կղեկավարի Բելառուսի ներկայացուցիչը: Դա բնական է, սակայն գոնե մեզ համար շատ վատ կլինի, եթե գլխավոր քարտուղարի պաշտոնը ստանձնի Ստանիսլավ Զասը. մարդ, որը սերտաճել է Ադրբեջանի քաղաքական ու գործարար շրջանակների հետ ու ՀԱՊԿ ԳՔ պաշտոնում անկասկած կգործի առնվազն ոչ մեր օգտին, մեծ հավանականությամբ՝ նաև մեր դեմ:

Գիտե՞ն արդյոք Հայաստանի հաղթանակի մասին փողփողող մարդիկ, որ Ստանիսլավ Զասը, որպես Բելառուսի ԱԱԽ քարտուղար, 2018թ. մարտի 1-ին հանդիպել է Ադրբեջանի նախագահի ներկայացուցչի հետ և ստորագրել Պոլոնեզ համակարգերի խմբաքանակը վաճառելու մասին: Քչերը նաև գիտեն, որ հենց Ստանիսլավ Զասն է Ադրբեջանի և Բելառուսի ռազմական համագործակցության կնքահայրը:

ՀՀ հաղթանակը կլինի, եթե հունվարին Ստանիսլավ Զասը չնշանակվի գլխավոր քարտուղար, այլ Բելառուսի մեկ այլ ներկայացուցիչ»:


Առաջարկում ենք նաև
Լրահոս