Ցեղասպանության միջոցառումները, Քիմ Քարդաշյանը, System Of A Down-ը, Ազնավուրը, Սպիվակովը, բոլորը' «խառնեցին» մեր մտքերը, մեր կյանքը, շեղեցին առօրյա հոգսերից, քաղաքականությունից…
Քաղաքականությունից զզվում ենք բոլորս, բայց առանց դրա էլ հնարավոր չէ…

Այնպես որ…
Ուշադրությու′ն, Օպերային հարող հատվածում, կարճատև կամ պարբերաբար օգտագործման նպատակով, վարձակալությամբ տրվում է տարածք քաղաքական շոուներ' անմտածված խոստումներ, պայքարի իմիտացիա, «թեժ» աշնանային-գարնանային սեզոնային պայքարի պատրվակով ոչ թեժ միջոցառումներ, իշխանություններին, պաշտոնյաներին, ոչ ընդիմադիր քաղաքական գործիչներին քննադատելու, հայհոյելու, անիծելու, հռետորական արվեստի տարրական գիտելիքների, արևածաղկի արագ չրթելու, բարձր գոռոցների մեջլիս-մրցույթներ անցկացնելու համար:

Տարածքը կարող է օգտագործվել նաև նստացույց-կանգնացույց-պառկելացույցեր, երբեմն հացադուլներ, անհամ, ոչինչ չասող մամուլի ասուլիսներ, դեպի աղոթավայրեր երթեր կազմակերպելու նպատակով…
Հացադուլավորները, որոնք հացադուլն անցկացնելու են տանը, բազմոցին բազմած, մտերիմների շրջապատում'նշված տարածքից այդ մասին կարող են հայտարարություն կատարել առանց վարձավճարի'անվճար:
Դարձյալ վերադարձ ի շրջանս յուր…Հերթագրվե′ք, շտապե′ք, տեղերը սահմանափակ են…

Ռոբերտ Մելքոնյան